काठमाडौँ, २१ जेठ । अब अक्सिजन र भेन्टिलेटर आवश्यक पर्ने कोरोना संक्रमितलाई मात्र अस्पतालमा भर्ना गरिने स्वास्थ्य तथा जनसङख्यामन्त्री भानुभक्त ढकालले बताएका छन । स्वास्थ्य सामग्री ग्रहण गर्ने एक कार्यक्रममा मन्त्री ढकालले कोरोना संक्रमित दुई हजार नाघेकोले अक्सिजन र भेन्टिलेटर आवश्यक पर्नेलाई मात्र अब अस्पतालमा भर्ना गर्ने बताएका हुन ।
अन्तर्राष्ट्रिय बौद्ध संस्था चु जी फाउन्डेसनको पहलमा हेल्थ इन्भ्याइरोन्मेन्ट एन्ड क्याइमेट एक्सन फाउन्डेसन (हेकाफ) ३६०० ले आज उपलब्ध गराएको स्वास्थ्य सामग्री ग्रहण गर्दै मन्त्री ढकालले सामान्यावस्थाका बिरामीलाई उपचारका लागि आइसोलेसनकक्ष स्थापना गरी त्यहाँ राखिने बताए ।
उनले अन्तर्राष्ट्रिय अभ्यास र अध्ययनमा सङ्क्रमित भएकामध्ये ८० प्रतिशत बिरामी सामान्यावस्थाका हुने भएकाले गम्भीर अवस्थाका बिरामीलाई अस्पताल र उपचारको अभाव नहोस् भन्नाका लागि अब नयाँ नीतिमा जाने स्पष्ट गरे ।
उनले मुलुकमा १५ हजारसम्म सङ्क्रमित हुन सक्ने आकलनका आधारमा त्यसको पाँच प्रतिशतका लागि भेन्टिलेटरसहितको अस्पतालमा राख्न सकिने प्रबन्धमा सरकार लागेको जानकारी दिँदै स्वास्थ्य सामग्रीको अभाव भएका बेला प्राप्त सहयोगलाई अतिआवश्यक ठाउँ हेरेर पारदर्शीरूपमा वितरण गरिने बताए ।
फाउन्डेसनका अध्यक्ष महेश नकर्मीले ३० थान भेन्टिलेटरसहित रु एक करोड ७० लाख मूल्य बराबरको सामान उपलब्ध गराइएको जानकारी दिँदै कोरोना उपचार र रोकथामका क्रममा सरकारसँग मिलेर आगामी दिनमा पनि निरन्तर सहयोग गरिने विश्वास दिलाए । सन् १९६६ मा बौद्ध गुरुमा चेङ येनको सक्रियतामा स्थापित फाउन्डेसनको संयुक्त राज्य अमेरिका, चीन, क्यानडासहित ६३ मुलुकमा शाखा स्थापित छन् ।
