काठमाडौँ, २४ माघ । चीनलाई नेपाल सरकारले एक लाख थान ‘प्रोटेक्टिभ’ मास्क प्रदान गरेको छ ।
कोरोना भाइरससँग जुधिरहेक चीनलाई नेपाल सरकारको निर्णय अनुसार शुक्रवार परराष्ट्र मन्त्री प्रदीप ज्ञवाली र स्वास्थ्य तथा जनसङ्ख्या मन्त्री भानुभक्त ढकालले चिनियाँ राजदूत होऊ यान्छीलाई मास्क हस्तान्तरण गरेका हुन् ।
चीनमा नोवल कोरोना भाइरसको सङ्क्रमणबाट जोगाउने मास्कको अत्यधिक माग भएपछि नेपाल सरकारले मास्क सहयोग गर्ने निर्णय गरेको थियो ।
परराष्ट्र मन्त्रालयमा आयोजित सहयोग सामाग्री हस्तान्तरण कार्यक्रममा नेपालका लागि चिनियाँ राजदूत होऊ यान्छीले कोरोना भाइरसको सङ्क्रमणमा नेपाललगायत अन्तर्राष्ट्रिय समुदायबाट प्राप्त सहयोग र एकता चीनका लागि महत्त्वपूर्ण भएको बताइन् । उनले यसबाट चिनियाँ नागरिक र नेतृत्वलाई थप ऊर्जा मिलेको समेत बताइन् ।
