काठमाडौं, २३ माघ । कोरोना भाइरसको संक्रमणको खतरालाई मध्यनजर गर्दै प्रधानमन्त्री केपी शर्मा ओलीले चीनबाट उद्धार गरी ल्याइने नेपालीहरुलाई उपत्यकाका चार स्थानमा राख्न निर्देशन दिएका छन् ।
बिहीबार प्रधानमन्त्री निवास बालुवाटारमा उपप्रधान तथा रक्षा, गृह, परराष्ट्र, स्वास्थ्य तथा जनसंख्या र पर्यटन मन्त्री, मुख्य सचिव र सम्बद्घ सचिवहरू, सुरक्षा अधिकारीहरूसहितको विशेष बैठकमा प्रधानमन्त्री ओलीले चीनबाट उद्धार गरिने नेपालीहरुलाई काठमाडौँ र भक्तपुरका चार स्थानमा राख्ने व्यवस्था गर्न माग गरेका हुन् ।
प्रधानमन्त्री ओलीले नागरिकको स्वास्थ्य र सुरक्षाका निम्ति निर्धा्रित कार्ययोजना अनुरूप समग्र तयारीमा जुट्न सम्बद्घ मन्त्रालय र निकायहरूलाई निर्देशन दिएका छन् । प्रधानमन्त्री ओलीले शिवपुरी, इचंगुनारायण, सूर्य्विनायक र खरिपाटी गरी चार स्थानमा क्वारेन्टाइन स्थल व्यवस्थित गरी राख्न निर्देशन दिएको प्रधानमन्त्रीको सचिवालयले जनाएको छ ।
