बेलबारी, २ माघ / दोस्रो बेलबारी आइडल हुने भएको छ । बेलबारी ३ स्थित ड्रिम ल्यान्डको सभाहलमा बिहीबार पत्रकार सम्मेलन गर्दै स्रष्टा समाज बेलबारी मोरङले जानकारी गराएको हो ।
आइडलमा ४ चरण हुने आयोजकले जनाएको छ । छनौट चरण, प्रिसेमिफाइनल राउन्ड, सेमिफाइनल राउन्ड र फाइनलमा प्रतियोगीहरूको प्रतिस्पर्धा हुने छ ।
आयोजकका अनुसार माघ १७ गते शुक्रवार बिहान ७ बजे वाड नं. ६ को प्रगति बोर्डिङ स्कुल, सोमबारे र दिउँसो १ बजे वाड नं. ७ को रणवीर बोर्डिङ स्कुल बाहुनीमा प्रथम अडिसन हुने छ । दोस्रो अडिसन भने १८ गते शनिवार बिहान ७ बजे वाड नं. ११ लक्ष्मी मा.वि र दिउँसो १ बजे वाड नं. १ स्थित सांस्कृतिक भवनमा हुनेछ ।
छनौट भएका प्रतियोगीहरू मात्र प्रिसेमिफाइनल राउन्डमा प्रवेश गर्न पाउने छन् । प्रिसेमिफाइनलबाट फाइनलमा प्रवेश गर्ने प्रतियोगीहरूले १ महिनाको पूर्ण प्रशिक्षण प्रदान गरिने सचिव जे.वि थुलुङले जनाएका छन् । फाइन भने चैत १ गते हुने छ ।
बेलबारी आइडल विजेताले नगद पुरस्कार रु.३० हजार, रु.३० हजार बराबरको गीत र भिडियो निर्माण, ट्रफी र प्रमाणपत्र प्राप्त गर्ने छन् । सह विजेताले नगद पुरस्कार रु.१५ हजार, ट्रफी , प्रमाणपत्र र उप विजेताले रु.१० हजार, ट्रफी , प्रमाणपत्र प्राप्त गर्ने छन् ।
नेपाल भ्रमण वर्ष २०२० लाई सघाउ पुग्ने गरी कार्यक्रम गरिने आयोजकले जनाएका छन् । बेलबारी नगरपालिको आर्थिक सहयोगमा हुने बेलबारी आइडलको हस्पिटालिटी पार्टनर ड्रिम ल्यान्ड रहेको छ ।
