काठमाडौं । नेपाली काँग्रेस र नेकपा एमालेले भोलि (शुक्रवार) नै नयाँ सरकार गठनको तयारी गरेका छन् । प्रधानमन्त्री पुष्पकमल दाहाल ‘प्रचण्ड’ ले प्रतिनिधिसभामा विश्वासको मत नपाउने निश्चित रहेकाले एमाले अध्यक्ष केपी शर्मा ओलीलाई भोलि नै प्रधानमन्त्री नियुक्त गराउने गरी तयारी अगाडि बढिरहेको स्रोतले जानकारी दिएको छ ।
बिहान ११ बजेका लागि प्रतिनिधिसभा बैठक बोलाइएको छ । बैठकमा प्रधानमन्त्री प्रचण्डले विश्वासको मत लिने कार्यक्रम हुने एमालेको बुझाई छ । प्रचण्डको पक्षमा अहिले बहुमत नजुट्ने लगभग निश्चित भइसकेको छ । उनको पक्षमा माओवादी केन्द्रका ३२, राष्ट्रिय स्वतन्त्र पार्टीका २१ र नेकपा एकीकृत समाजवादीका १० जना बाहेक अन्य सांसदको समर्थन खुलेको छैन । काँग्रेस, एमाले, राष्ट्रिय प्रजातन्त्र पार्टी, जनता समाजवादी पार्टी, जनता समाजवादी पार्टी नेपाल, लोकतान्त्रिक समाजवादी पार्टी, नागरिक उन्मुक्ति पार्टीलगायतले विश्वासको मत नदिने निर्णय नै गरिसकेका छन् ।
यद्यपि विश्वासको मत लिने प्रतिनिधिसभाको बैठक कति लम्बिन्छ, त्यसले ओली प्रधानमन्त्री बन्ने समय निर्धारण गर्न सक्छ । ‘विश्वासको मतको कार्यक्रम दिउँसो २ देखि अढाई बजे (२ः३०) सम्म चल्न सक्छ,’ एमालेका एक नेता भन्छन् । त्यसपछि लगत्तै संसद् सचिवालयले राष्ट्रपति कार्यालयमा जानकारी दिने एमालेको बुझाई छ । ‘राष्ट्रपतिबाट नयाँ सरकारको आह्वान हुनासाथै दुई तिहाइ बहुमतसहित दाबी प्रस्तुत गर्ने तयारी भइरहेको छ,’ एमालेका ती नेताले सुनाए ।
राष्ट्रपति पौडेलबाट भोलि दिउँसोभित्रै नयाँ सरकारका लागि आह्वान हुनेमा एमाले–काँग्रेस विश्वस्त छन् । यस्तै नेपालको संविधानको धारा ७६ को उपधारा २ बमोजिमकै सरकार आह्वान हुनेमा पनि दुवै पार्टी विश्वस्त छन् । त्यसपछि लगत्तै बहुमतसहित एमाले अध्यक्ष ओलीले सरकारको दाबी पेस गर्नेछन् ।
त्यसका लागि काँग्रेस र एमालेले आ–आफ्ना सांसदको हस्ताक्षर सङ्कलन गरिसकेका छन् । दुवै पार्टीका १६६ जना सांसद छन् । जुन २७५ सिटको प्रतिनिधिसभामा दुई तिहाइ जुटाउन १७ सिट कम हो । काँग्रेसले विपक्षी दलहरूसँग सरकारमा सामेल हुन आग्रह गरिरहेको छ । जसले दुई तिहाइ सहित सरकारमा दाबी गर्ने आँकडा पुग्ने एमालेको विश्वास छ । ‘बहुमतसहित प्रधानमन्त्रीमा दाबी आए राष्ट्रपतिलाई तत्काल प्रधानमन्त्री नियुक्त गर्न बाधा हुन्न । अनि अध्यक्ष कमरेड भोलि प्रधानमन्त्री भइहाल्नु हुन्छ नि,’ ती नेताले भने ।
