प्रहरी निरीक्षक खेमप्रसादसहित १६ जनालाई निलम्बनको निर्देशन (सूचिसहित)

काठमाडौँ, १४ फागुन । चीनबाट अवैध रूपमा नेपाल भित्रिएको सुन बरामद गरी बाँडफाँड गरेको आरोपमा प्रहरी निरीक्षक खेमप्रसाद नेपालसहित १६ जना प्रहरीलाई निलम्बनको निर्देशन दिएको छ ।

अख्तियार दुरुपयोग अनुसन्धान आयोगले रसुवाको सीमा प्रहरी चौकी टिमुरेलाई केरुङबाट अवैध रूपमा भित्रिएको सुन बरामद गरेर एकआपासमा बाँडफाँड गरेको उजुरी परेपछि प्रहरी प्रधान कार्यालय नक्साललाई पत्राचार गर्दै प्रहरी निरीक्षकदेखि जवानसम्मलाई निलम्बन गर्न निर्देशन दिएको हो ।

केरुङबाट नेपाल आउँदै गरेको ना ६ ख ४९३२ नम्बरको कन्टेनरबाट गएको पुस ११ गते भित्रिएको ४२२ ग्राम सुन सम्बन्धित निकायमा नबुझाई आपसमा बाँडफाँड गरेको आयोगमा उजुरीपछि छानबिन सुरु गरेको हो ।

प्रहरी निरीक्षक नेपालको समूहले गाडी चालक फुर्वा पासाङको साथमा रहेको सुन बरामदपछि चालकलाई छाडेको आयोगले जनाएको छ । पदमा रहँदा प्रमाण लोप वा नष्ट गर्न सक्ने भएकाले उनीहरूलाई पदबाट निलम्बन गर्न पत्र लेखेको आयोगका प्रवक्ता प्रदीपकुमार कोइरालाले जानकारी दिए ।