काठमाडौँ, ८ फागुन । नेपालस्थित स्वीटरल्याण्डको दूतावासले निवर्तमान सञ्चार मन्त्री गोकुल बास्कोटासँग ‘स्वीस कम्पनीका प्रतिनिधि’ भनेर गरिएको अडियो कुराकानीबारे कुनै संलग्नता नरहेको जनाएको छ ।
दूतावासले यसबारे बिहीबार जारी गरेको वक्तव्यमा भनिएको छ, ‘स्वीटरल्यान्डको राजदूतावास यो स्पष्ट गर्न चाहन्छ कि यस दूतावासले कुनै बैठकको आह्वान गरेको छैन, न त समाचारमा उल्लेखित विषयमा सञ्चार तथा सूचना प्रविधि मन्त्रीसँग निकट भविष्यमा कुनै छलफल तोकिएको थाहा छ ।’ प्रेस वक्तव्यमा अगाडि भनिएको छ, ‘स्विस कम्पनीका प्रतिनिधि भनेर समाचारमा उद्धृत गरिएका व्यक्तिको लेनदेनबारे दूतावास जानकार नरहेको जनाएको छ ।
अडियोमा दूतावासको नाम मुछिएपछि वक्तव्यमार्फत एम्बेसीले खण्डन गरेको हो । दूतावासले सेक्युरिटी प्रेससम्बन्धी ‘रिपब्लिका’मा प्रकाशित समाचारको खण्डन गर्दै यस्तो बताएको हो ।
