इस्टानबुलको विमानस्थलमा एक यात्रुवाहक विमान अवतरण गर्ने क्रममा तीन व्यक्तिको मृत्यु हुनको साथै करिब १७० बढी यात्रु घाइते भएका छन् ।
विमान अवतरण गर्ने क्रममा धावनमार्गमा चिप्लिएर तीन भागमा टुक्रिएको छ ।
‘द पेगासस एयरलाइन्स’को उक्त विमानमा १७१ यात्रु र चालक दलका ६ जना सदस्य सवार थिए । देशको पश्चिममा रहेको इजमिर प्रान्तबाट आएको सो विमान सबिहा गोकसेन विमानस्थलमा बुधवार दुर्घटना भएको हो ।दुर्घटना भएको विमान भारी हावाहुरी र वर्षाबिच अवतरण गर्ने प्रयासमा थियो ।
उक्त विमान दुर्घटनापछि विमानस्थल बन्द गरेर अन्य उडानहरू अन्तै मोडिएको थियो । बोर्डमा रहेका अधिकांश मानिस टर्कीका नागरिक थिए । स्थानीय मिडियाका अनुसार विमान दुर्घटनामा १२ अन्य देशका २२ विदेशी नागरिक थिए ।
इस्टानबुलका गभर्नर अलि येर्लिकायाका अनुसार, दुर्भाग्यवश पेगासस एयरलाइन्सको विमान खराब मौसमको कारण धावनमार्गमा टिक्न नसक्दा ५०–६० मिटर सम्म चिप्लन पुग्यो । विमान रनवेको अन्त्यबाट ३० देखि ४० मिटरको बिचमा चिप्लिएको थियो ।
