काठमाडौं । भारतीय चलचित्रका दिग्गज अभिनेता तथा निर्देशक नाना पाटेकरको ७५ वर्षको उमेरमा निधन भएको छ । पाटेकरको बिहीबार बिहान गोवास्थित डोना पाउलाको निवासमा कार्डियाक अरेस्ट भएपछि निधन भएको हो ।
निवासमा अचेत अवस्थामा भेटिएका पाटेकरलाई तत्काल गोवास्थित मणिपाल अस्पताल पुर्याइएको थियो । अस्पतालका चिकित्सकका अनुसार उनलाई करिब ४५ मिनेटसम्म निरन्तर सीपीआरलगायतका पुनर्जीवन प्रयास गरिए पनि बचाउन सकिएन । उनलाई बिहान करिब ५:२० बजे मृत घोषणा गरिएको थियो ।
भारतीय सञ्चारमाध्यमका अनुसार पाटेकरले बिहीबार बिहान करिब २:३० बजे आफू असहज महसुस भइरहेको जानकारी एक साथीलाई दिएका थिए । त्यसपछि साथी र हेरचाहकर्ताले उनलाई अस्पताल पुर्याउने व्यवस्था गरेका थिए। अस्पतालले उनको मृत्युको घटनालाई चिकित्सकीय-कानुनी प्रक्रिया अन्तर्गत दर्ता गरी पोस्टमार्टम गर्ने जनाएको छ ।
सन् १९५१ जनवरी १ मा महाराष्ट्रमा जन्मिएका पाटेकरले मराठी रंगमञ्चबाट अभिनय यात्रा सुरु गरेका थिए । सन् १९७८ को ‘गमन’बाट हिन्दी चलचित्रमा प्रवेश गरेका उनले त्यसपछि हिन्दी तथा मराठी चलचित्रमा करिब पाँच दशक लामो अभिनय यात्रा तय गरे ।
‘परिन्दा’, ‘क्रान्तिवीर’, ‘सलाम बम्बे’, ‘नटसम्राट’, ‘अब तक छप्पन’, ‘वेलकम’, ‘ट्याक्सी नम्बर ९२११’ लगायतका चलचित्रमा उनले निर्वाह गरेका भूमिकाले उनलाई भारतीय चलचित्रमा विशिष्ट पहिचान दिलाएको थियो । उनी गम्भीर, हास्य तथा चरित्रप्रधान भूमिकामा समान रूपमा चर्चित थिए ।
पाटेकर अभिनयसँगै निर्देशनमा समेत सक्रिय थिए। उनले ‘प्रहार : द फाइनल अट्याक’बाट निर्देशनमा प्रवेश गरेका थिए । चलचित्र क्षेत्रमा योगदानका लागि उनले तीनवटा राष्ट्रिय चलचित्र पुरस्कार प्राप्त गरेका थिए भने भारत सरकारले सन् २०१३ मा उनलाई पद्मश्रीबाट सम्मानित गरेको थियो । भारत सरकारको पद्म पुरस्कारसम्बन्धी अभिलेखमा उनको नाम ‘विश्वनाथ दिनकर पाटेकर उर्फ नाना पाटेकर’का रूपमा उल्लेख छ ।
चलचित्रबाहेक पाटेकर सामाजिक कार्यमा पनि सक्रिय थिए । अभिनेता मकरन्द अनासपुरेसँग मिलेर स्थापना गरिएको नाम फाउन्डेसनमार्फत उनले महाराष्ट्रका किसान तथा खडेरी प्रभावित समुदायका लागि पानी संरक्षण, कृषि तथा सामाजिक सहयोगका क्षेत्रमा काम गरेका थिए ।
पाटेकरको निधनपछि भारतीय चलचित्र क्षेत्र तथा राजनीतिक वृत्तबाट श्रद्धाञ्जली व्यक्त गरिएको छ । प्रधानमन्त्री नरेन्द्र मोदीलगायत विभिन्न कलाकार तथा नेताहरूले उनको निधनप्रति दुःख व्यक्त गरेका छन् ।
महाराष्ट्र सरकारले पाटेकरको अन्त्येष्टि पूर्ण राजकीय सम्मानका साथ गर्ने निर्णय गरेको जनाएको छ । करिब पाँच दशक भारतीय चलचित्रमा प्रभावशाली उपस्थिति जनाएका पाटेकरको निधनसँगै हिन्दी तथा मराठी चलचित्रले विशिष्ट शैलीका एक प्रभावशाली अभिनेता गुमाएको छ ।
