मोरङ । बेलबारीका ऐतिहासिक, सामाजिक तथा साहित्यिक व्यक्तित्व, ‘साहित्यकार पुण्यप्रसाद सुवेदीको जीवनी, व्यक्तित्व तथा कृतित्वमाथिको विमर्श’ कार्यक्रम सम्पन्न भएको छ । ‘कोसी साहित्य-कला परिषद् नेपाल’ को आयोजनामा बेलबारी बहुमुखी क्याम्पस, बेलबारी, मोरङको सभाहलमा एक विमर्श कार्यक्रम सम्पन्न गरिएको हो ।
‘कोसी साहित्य-कला परिषद् नेपाल’ को औपचारिक सार्वजनिक करणसमेत रहेको उक्त कार्यक्रममा वरिष्ठ साहित्यकार, उपद्रष्टा, हर्कमान तामाङ प्रमुख अतिथि रहेका थिए । उक्त कार्यक्रममा बेलबारी नगरपालिकाका प्रमुख दिलप्रसाद राई, वरिष्ठ साहित्यकार केशव आचार्य, डा. दीपकप्रसाद न्यौपाने, कवि समीक्षक मिश्र बैजयन्ती, भाषाविद् अमृतप्रसाद आचार्य, सुकुना बहुमुखी क्याम्पसका पूर्व क्याम्पस प्रमुख प्रेमप्रसाद भट्टराई, नेपाल मुक्तक प्रतिष्ठान कोसी प्रदेशका अध्यक्ष बाबुराम पोखरेल, छन्दवाटिका नेपाल, विराटनगरका अध्यक्ष हरि कट्टेल, बेलबारी साहित्य विकास समितिका अध्यक्ष रमेश निरौलालगायतका विशिष्ट व्यक्तित्वहरूको उपस्थिति रहेको थियो ।
कार्यक्रममा पुण्यप्रसाद सुवेदीको काव्यकारितामा डा. दीपकप्रसाद न्यौपाने, आख्यानकारितामा समीक्षक मिश्र बैजयन्ती र समकालीनसमेत रहेका वरिष्ठ साहित्यकार हर्कमान तामाङलाई राखेर विमर्श गरिएको थियो । वक्ताहरूले गहिराइसम्म पुगेर उनको जीनी, व्यक्तित्व तथा कृतित्वका बारेमा बोलेका थिए । त्यस्तै कार्यक्रममा बेलबारी नगरपालिकाका प्रमुख दिलप्रसाद राई, वरिष्ठ साहित्यकार केशव आचार्य, बेलबारी साहित्य विकास समितिका अध्यक्ष रमेश निरौला, परिवारका तर्फबाट पुण्यप्रसादका भाइ श्रषिकेश सुवेदी र छोरा परसुराम सुवेदी आदिले संस्थाले सुरु गरेको अभियान तथा पुण्यप्रसादका विषयमा आआफ्ना धारण व्यक्त गरेका थिए । कार्यक्रममा पुण्यप्रसाद सुवेदी र उनीसँग जोडिएर आजसम्म गरिएका कार्यका बारेमा उठेका प्रश्नलाई विभिन्न कोणबाट उत्तर खोजिएको थियो ।
कार्यक्रममा स्रष्टाहरू रेखा सुवेदी, हरि कट्टेल, कृष्ण उदासी र युवराज ठकुरीले पुण्यप्रसाद सुवेदीका कवितावाचन गरेका थिए भने सप्तक कला केन्द्र सलकपुर, मोरङका कलाकारले पुण्यप्रसाद सुवेदीका कालजयी गीतहरू गाइएका थिए ।
संस्थाका अध्यक्ष केशु विरहीले संस्थाको गतिविधिमाथि प्रस्ट पारेका थिए । स्थापना र स्थापना पछि सञ्चालन गरिएका कार्यक्रमका बारेमा प्रस्ट पार्दै विरहीले आफूहरू नयाँ तर साहित्यमा केही राम्रो गरौँ भनेर यस संस्थाका माध्यमबाट एकजुट भएको बताए । निकै छलफल तथा विमर्शपछि मात्र संस्थाको स्थापना गरिएको बताउँदै विरहीले अग्रजको सम्मान तथा युवापुस्तामा अभिप्रेरणा, क्षमता र योगदानका आधारमा मूल्याङ्कन, साहित्यमा थिति बसाउने प्रयास, संस्थालाई साझा चौतारीका रूपमा विकास, साहित्य कला ग्रामको अवधारणा, साहित्यको बजारीकरण तथा अन्तर्राष्ट्रियकरण आदि कार्यहरू गर्ने प्रतिबद्धता व्यक्त गरे । पत्रकारसमेत रहेको विरहीले आफूहरू मञ्चलाई कार्यक्रम स्थलका रूपमा मात्र विकास गर्ने, खादा मालाको प्रयोग नगर्ने, गर्नुपरेमा सम्मानका लागि मात्र गर्ने, बौद्धिक श्रमको न्यूनतम भए पनि पारिश्रमिकको सुरुआत गर्ने, नयाँ पुस्तालाई प्राथमिकतामा राखेर कार्य गर्ने बताए ।
संस्थाले १ रुपियाँबाट सुरु गरेर १ करोड बराबरको अक्षयकोष पु¥याउने अभियानको सुरुआतसमेत गरेको छ ।
उपाध्यक्ष विष्णु भण्डारी आचार्यले कार्यक्रममा उपस्थित सबैलाई शब्दले स्वागत गरेकी थिइन् । ‘कोसी साहित्य-कला परिषद् नेपाल’ का अध्यक्ष केशु विरहीको अध्यक्षतामा सम्पन्न कार्यक्रमको सञ्चालन भने सचिव नवराज पोखरेल ‘नवशिला’ को रहेको थियो ।
