बेलबारी । बेलबारी निवासी विक्रम राईले पदबाट राजीनामा दिएका छन् । भ्रष्टाचारविरुद्ध र सामाजिक सञ्जाल सुचारु गर्नुपर्ने मागसहित सुरु भएको Gen-Z आन्दोलनलाई सम्बोधन नगरी विद्यार्थी र नागरिकको ज्यान जाने असामान्य परिस्थिति उत्पन्न भएपछि उनले पार्टी र जनप्रतिनिधिको जिम्मेवारीबाट राजीनामा दिएको घोषणा गरेका हुन् ।
राईले नगरवासीहरूलाई सम्बोधन गर्दै आफूले लिएको निर्णय देश र जनताको पक्षमा हुने विश्वास व्यक्त गरेका छन् । उनले भने, “जनसरोकारका मागलाई बेवास्ता गर्ने र निर्दोष विद्यार्थी तथा नागरिकको ज्यान जाने अवस्थाले मलाई गहिरो पीडा दिएको छ । यही कारण मैले जिम्मेवारीबाट अलग हुने निर्णय गरेको हुँ ।” उनले अब आफ्नो आगामी कदम युवा आन्दोलनको न्यायपूर्ण मागसँग ऐक्यबद्ध हुँदै अघि बढ्ने जनाएका छन् ।
