काठमाडौं । सत्तारूढ गठबन्धनका प्रमुख घटक नेपाली काँग्रेसका सभापति तथा पूर्वप्रधानमन्त्री शेरबहादुर देउवाले नेपालमा अब ‘वास्तविक कम्युनिष्ट’ नरहेको टिप्पणी गरेका छन्। बिहीबार काठमाडौँमा आयोजित नेपाल शिक्षक संघको २४औँ संघीय प्रतिनिधिसभालाई सम्बोधन गर्दै देउवाले नेपालमा देखिएका वर्तमान कम्युनिष्टहरूलाई विश्वमा लोप भइसकेका पुराना कम्युनिष्टसँग तुलना गर्न नमिल्ने बताएका हुन्।
“साँचो अर्थमा अब कम्युनिष्ट विश्वमै सकिइसकेको अवस्था छ, तर नेपालमा भने उल्टै बढिरहेको देखिन्छ। तर ती पनि विगतका कम्युनिष्टजस्तो छैनन्। अहिले त डेमोक्रेट भइसकिएका छन्, यस्तो अवस्थामा उनीहरूलाई कम्युनिष्ट नै भन्नु उपयुक्त हुँदैन,” देउवाले स्पष्ट रूपमा भने। उनको भनाइमा, वर्तमान संविधानले स्वीकारेको बहुदलीय प्रजातान्त्रिक प्रणाली (Multi-Party Democratic System) अनुसार अब सबै दलहरू प्रजातान्त्रिक मूल्यमान्यताभित्र आबद्ध भइसकेका छन्, जस कारण कम्युनिष्ट दलहरूको पुरानै धारणा अब लागु नहुने बताएका हुन्।
“शिक्षकहरूको तलब वृद्धि गराउन पहल गर्छु”
कार्यक्रमको क्रममा सभापति देउवाले शिक्षकहरूको तलब वृद्धिका लागि आफूले सरकारसँग छलफल गर्ने प्रतिबद्धता समेत जनाएका छन्। नेपालको अर्थतन्त्र दबाबमा रहेको र अर्थमन्त्री स्वयंले ‘पैसा छैन’ भन्ने अवस्था रहेको बताउँदै देउवाले शिक्षकहरूको जीवनस्तर र महँगीबिचको असन्तुलनलाई गम्भीरतापूर्वक लिनुपर्नेमा जोड दिए।
“शिक्षक साथीहरूका मागहरू जायज छन्। तलबले अबको महँगी धान्न सक्दैन। यस्तो अवस्था सच्याउन सरकारसँग म कुरा गर्छु,” देउवाले भने। उनले शिक्षकमाथि राज्यको दायित्व रहेको उल्लेख गर्दै राजनीतिक आन्दोलनमा मात्र होइन, सामाजिक परिवर्तन र चेतनाको विकासमा पनि शिक्षकहरूको भूमिका महत्त्वपूर्ण रहेको स्मरण गराए।
सभापति देउवाले नेपालको लोकतान्त्रिक आन्दोलनमा शिक्षक समुदायले खेलेको भूमिकाको प्रशंसा गर्दै, शिक्षक सङ्घसँग सहकार्य गरेर शिक्षा क्षेत्र सुधार गर्न काँग्रेस सधैँ तत्पर रहेको बताए। कार्यक्रममा उनले शिक्षकहरूको सङ्गठनलाई बलियो बनाउन, व्यावसायिक मर्यादा कायम राख्न र शिक्षाको गुणस्तरमा सुधार ल्याउन निरन्तर सहयोग गर्ने प्रतिबद्धता समेत जनाए।
