काठमाडौं । सत्तारुढ नेकपा एमालेको विद्यार्थी सङ्गठन अखिल नेपाल राष्ट्रिय स्वतन्त्र विद्यार्थी युनियन (अनेरास्ववियु) को २४औँ राष्ट्रिय महाधिवेशन अन्तर्गत नेतृत्व चयनका लागि आज (बुधवार) मतदान हुने भएको छ। मङ्गलवार राति उम्मेदवारी दर्ता भएपछिको प्रक्रियाअनुसार आज बिहान १० बजेदेखि साँझ ५ बजेसम्म मतदान हुने कार्यतालिका तय गरिएको निर्वाचन समितिले जनाएको छ। यद्यपि अझै पनि सहमतिको प्रयास भइरहेकाले मतदान समय केही सर्न सक्ने सम्भावना रहेको अध्यक्ष मण्डल स्रोतले जनाएको छ।
३२ वर्षे उमेर हद लागेपछि अध्यक्ष पदमा प्रकाश पौडेल र डा. सुजन कडरिया दुई उम्मेदवारबिच प्रत्यक्ष प्रतिस्पर्धा हुने भएको छ। यद्यपि सहमतिको प्रयास स्वरूप अध्यक्ष मण्डलले डा. कडरियाको अध्यक्षतामा प्रकाश पौडेललाई उपाध्यक्ष र दीपक धामीलाई महासचिव बनाउने प्रस्ताव पनि अघि सारेको थियो। तर, पौडेल समूहले नाराबाजी गर्दै निर्वाचनको माग गरेपछि निर्वाचनमार्फत नै नेतृत्व चयन गरिने सहमति बनेको हो।
खुला उपाध्यक्ष पदमा राजकुमार ढकाल, विकास श्रेष्ठ, भरत धामी, धर्मेन्द्र केसी लगायतका उम्मेदवार छन् भने महिला उपाध्यक्ष तर्फ आरती भट्टराई, अञ्जना सिवाकोटी, भवानी बजगाईँ, र सुनिता धिताल प्रतिस्पर्धामा छन्। महासचिव पदमा दीपक धामी, आरके रोमश, र सुनिल कँडेलबिच प्रतिस्पर्धा छ।
पार्टीको संशोधित नीतिअनुसार अनेरास्ववियुमा ९ सदस्यीय पदाधिकारी समिति र १५१ सदस्यीय केन्द्रीय कमिटी बनाइनेछ। तर, सचिव पदमै २६ जना भन्दा बढीको उम्मेदवारी परेको छ भने केन्द्रीय कमिटी सदस्यतर्फ ६ सयभन्दा बढी उम्मेदवार दर्ता भएका छन्। पदाधिकारीमै झण्डै ५० जना हाराहारीमा उम्मेदवारी परेका छन्।
नेकपा एमाले अध्यक्ष केपी शर्मा ओली, महासचिव शंकर पोखरेल, विद्यार्थी इन्चार्ज किशोरविक्रम मल्ल लगायत नेताहरूले महाधिवेशनमा सहमति खोज्ने अन्तिम प्रयास गरेका थिए। मङ्गलवार बन्द सत्रको हलमा प्रस्ताव गरिएको नामावलीमा एकमत नजुटेपछि निर्वाचनको बाटो रोजिएको हो।
आज हुने भनिएको मतदानले अनेरास्ववियुको नयाँ नेतृत्व को बन्ने भन्ने प्रश्नको जवाफ दिनेछ। यद्यपि अन्तिम क्षणसम्म पनि सहमतिको सम्भावना खुला नै छ।
