मोरङ । नेकपा (एमाले) कोशी प्रदेशको अध्यक्षमा घनश्याम खतिवडा निर्वाचित भएका छन् । उनका प्रतिस्पर्धी विनोद प्रसाद ढकाललाई ८२ मतान्तरले पछि पार्दै खतिवडा अध्यक्षमा विजयी भएका हुन् ।
खतिवडालाई ५१२ मत खसेको छ भने ढकाललाई ४३० मत खसेको छ । २६ मत भने बदर भएको छ । पदाधिकारीमा निर्वाचितहरू सबै खतिवडा पक्षकै रहेका छन् ।
उपाध्यक्षमा भने धनकुटाका टीकाराम चेम्जोङ निर्विरोध निर्वाचित भएका छन् । सचिवमा उदयपुरका शैलेश लामालाई १४३ मतान्तरले पछि पार्दै पाँचथरका राजकुमार भण्डारी विजयी भएका छन् । राजकुमारलाई ५२४ मत खसेको छ भने लामाले ३८१ मत प्राप्त गरेका छन् ।
उपसचिवमा खोटाङका देवान राई र झापाकी जलवर्षा राजवंशी निर्वाचित भएका छन् । राईलाई ६१० र राजवंशी ६२८ मत खसेको छ ।
