काठमाडौँ । गत साउन ३ गते बरामद ६० किलो सुन तस्करी प्रकरणमा केन्द्रीय अनुसन्धान ब्युरो (सीआईबी) को अनुसन्धानको दायरा फराकिलो बनाउँदै लगेको छ । सीआइबीले पूर्व उपराष्ट्रपति नन्दकिशोर पुनका छोरा दिपेश पुनसँग बयान लिएको छ । महाराजगञ्जस्थित ब्युरोमा पुगेर उनले बयान दिएको प्रहरी उच्च स्रोतले जानकारी दिएको छ । ६० किलो सुन तस्करी प्रकरणमा छानबिनका दायरामा आएका व्यक्तिहरूसँग उठबस देखिएपछि पुनको सीआईबीले बयान लिएको हो ।
राजस्व अनुसन्धान विभागले १८ दिन छानबिन गरेपछि फाइल जिम्मा लिएको सीआईबीले अहिले विभिन्न व्यक्तिहरूसँग बयान र सोधपुछ थालेको हो । त्रिभुवन विमानस्थल भन्सारका तत्कालीन प्रमुख अरुण पोखरेलसँग पनि सीआईबीले सोधपुछ गरिरहेको छ । सुन तस्करी प्रकरणमा नेताहरू र भिआइपी पनि जोडिएको चर्चाबिच सीआईबीले शङ्कास्पद भूमिका देखिएकाहरूसँग सोधपुछलाई तीव्र बनाएको हो ।
नेकपा माओवादी केन्द्र निकट अनेरास्ववियु क्रान्तिकारीका महासचिव समेत रहेका पुनलाई सोमबार झिकाएर सोधपुछ गरिएको सीआबी स्रोतले जनाएको छ । दिपेशको नाम यसअघि पटक–पटक सुन तस्करीसँग मुछिएका व्यक्तिहरूसँग उठबस रहेको भन्दै समाचार पनि सार्वजनिक भएका थिए । यो प्रकरणको अनुसन्धान फाइल सीआईबीले यही महिनाभित्र सरकारी वकिलकहाँ पठाउने गरी तयारी गरिरहेको छ ।
