विराटनगर, २७ साउन । विराटनगर १४ को विराट साइन्स क्याम्पसको भवन प्रदेश १ सरकारलाई हस्तान्तरण गरिने भएको छ । करिब ७ वर्षदेखि प्रयोग विहीन बन्दै आएको भवन व्यवस्थापन समितिले प्रदेश सरकारलाई हस्तान्तरण गर्न लागेको हो ।
व्यवस्थापन समितिको क्याम्पसको भवन, क्याम्पस भित्र रहेका पुस्तक लगायतका सामाग्री हस्तान्तरण गर्ने प्रस्ताव प्रदेश सरकार अन्त्रगतको मनमोहन प्राविधिक विश्वविद्यालयले स्वीकार गरेको छ ।
भवन, क्याम्पसको सम्पत्ति एक औपचारिक कार्यक्रमकावीच चाँडै हस्तान्तरण गरिने व्यवस्थापन पक्षले जनाएको छ । प्रदेश सरकार मातहत क्याम्पसको भवन आउने भएपछि आज सामाजिक विकास मन्त्री जीवन घिमिरेले क्याम्पसको अवलोकन गर्नु भएको छ । प्रदेश सरकारले क्याम्पस भवनमा पशु विज्ञान कार्यक्रम सञ्चालन गर्ने गरी विज्ञसँग छलफल सुरु भएको मन्त्री घिमिरेले बताउनुभयो ।
मनमोहन प्राविधिक विश्वविद्यालय अहिले पाठ्यक्रम तयारीमा रहेकाले शैक्षिक कार्यक्रम सञ्चालन गर्न १ देखि डेढ वर्ष लाग्ने भएकाले तत्कालका लागि प्रदेश सरकारले सीप प्रशिक्षण केन्द्र सुरु गर्ने उहाँले बताउनुभयो । सामाजिक विकास मन्त्रालय र मनमोहन प्राविधिक विश्वविद्यालय अन्त्रगतका तालिम विराट क्याम्पसको भवनबाट सुरु गर्ने मन्त्री घिमिरेले बताउनुभयो । तालिम केन्द्र निर्माणका लागि सामाजिक विकास मन्त्रालय र सुनसरीको करुणा फाउन्डेसनबिच सहकार्य हुने भएको छ ।
करुणाले भवनको मर्मत सम्हारको काम गर्ने भएको छ । भवन मर्मतका लागि ५७ लाख ९२ हजारको लागत इस्टिमेट निकालिएको फाउन्डेसनका योगेन्द्र गिरीले बताउनुभयो । वि.स.२०४८ सालमा स्थापना भएको क्याम्पस ७ वर्षदेखि बन्द भएको सोही क्षेत्रका प्रदेशसभा सदस्य जयराम यादवले बताउनुभयो । उहाँले तत्काल सञ्चालन गर्नुपर्ने स्थानीयको माग रहेको प्रदेशसभा सदस्य यादवले बताउनुभयो । प्रदेश सरकारले विश्वविद्यालयको कार्यक्रम सुरु गर्ने निर्णय गर्नु गौरवको कुरा भएको उहाँले बताउनुभयो ।
क्याम्पस सञ्चालक समिति र दाताले भवन अगाडी रहेको प्रतिमाको संरक्षण, कामदारको निरन्तरता र क्याम्पस भवनमा राखिएको संस्थापकहरूको नामावली रहेको शिलालेखको संरक्षण गर्नुपर्ने सर्त राखेको छ ।
