बेलबारी, चैत २९ । लकडाउन उल्लंघन गर्ने मोटरसाइकल रोक्न खोज्दा ठक्करबाट मोरङको बेलबारी वाड नं. ११ मा अवस्थित लक्ष्मिमार्ग सशस्त्र बेस क्याम्पका प्रहरी निरीक्षक घाइते भएका छन् ।
बिहीबार साँझ बेलबारी ११ लक्ष्मीमार्ग चौक स्थित पूर्व–पश्चिम राजमार्गमा पश्चिमबाट पूर्वतर्फ जाँदै गरेको को १८ प ६२९३ नम्बरको मोटरसाइकलले ठक्कर दिँदा निरीक्षक चेतन बाह्रकोटी घाइते भएका हुन् ।
मोरङ प्रहरीका प्रवक्ता डिएसपी मानबहादुर राईका अनुसार बाह्रकोटीको दाहिने कुमको जोर्नी खुस्किएको छ । बाह्रकोटी झापाको बी एण्ड सी अस्पतालमा उपचार पश्चात् क्याम्प फर्की सकेका छन् ।
मोटरसाइकल चालक मोरङको मिक्लाजुङ गाउँपालिका– १ का २९ वर्षीय तीर्थबहादुर राई र पछाडि सवार १९ वर्षीय सुजन राईलाई नियन्त्रणमा लिइएको छ ।
