काठमाडौँ, १३ चैत । छिमेकी देश भारतमा कोरोना (कोभिड–१९) भाइरसबाट ज्यान गुमाउनेको सङ्ख्या १३ पुगेको छ । बुधवार भारतमा कोरोनाबाट तीन जनाको ज्यान गएको भारतीय सञ्चार माध्यमले जनाएका छन् ।
बुधवार बिहान ५४ वर्षीय मानिसले कोभिड–१९ को कारण ज्यान गुमाएका थिए । त्यस्तै साँझपख मध्यप्रदेशको उज्जैनमा ६५ वर्षीय महिलाले ज्यान गुमाएकी थिइन् । बुधवार राति गुजरातको अहमदावादकी ८५ वर्षीय महिलाको पनि यो भाइरसको कारण ज्यान गएको बताइएको छ । यससँगै भारतमा मृत्यु हुनेको सङ्ख्या १३ पुगेको हो ।
भारतमा कोरोना भाइरसको प्रकोप पनि २५ राज्यमा फैलिसकेको छ । स्थानीय सञ्चारमाध्यमका अनुसार अहिलेसम्म भारतमा ६८६ जनामा यो भाइरसको सङ्क्रमण देखिएको छ ।
भारतमा यो भाइरसको सङ्क्रमण फैलिन नदिन २१ दिनसम्म लकडाउनको निर्णय गरिएको छ । अहिलेसम्म भारतको महाराष्ट्र र केरला भाइरसबाट सबैभन्दा प्रभावित देखिएका छन् । पछिल्लो केही दिनयता भारतमा कोरोना भाइरसको सङ्क्रमितको सङ्ख्यामा उल्लेख्य वृद्धि भएको छ ।
