तेहरान, १६ फागुन । कोरोना (कोभिड–१९) भाइरसको सङ्क्रमण इरानकी उपराष्ट्रपति मसुमेह इब्तेकरलाई देखिएको अन्तर्राष्ट्रिय सञ्चारमाध्यमहरूले जनाएका छन् ।
कोरोनाको सङ्क्रमणबाट सर्वसाधारण नागरिक मात्र नभई उच्च अधिकारीहरू समेत सिकार बनेका छन् ।
उनी इरानका चार जना उपराष्ट्रपतिमध्ये महिला मामिलासम्बन्धी उपराष्ट्रपति हुन् । क्याबिनेट बैठकमा इब्तेकर राष्ट्रपति हसन रूहानीको नजिकै बस्ने गर्थिन् । बिहीबार पनि उनी क्याबिनेट बैठकमा सहभागी भएकी थिइन् ।
कोरोना सङ्क्रमण देखिएपछि उनी अहिले घरमै क्वारेन्टाइन बसिरहेको इरानी सञ्चारमाध्यमले उल्लेख गरेका छन् । इरानमा कोरोना सङ्क्रमित हुने उनी सातौँ उच्च सरकारी अधिकारी हुन् । अरू कुनै पनि देशमा उच्च तहका यति धेरै सरकारी अधिकारीलाई उक्त भाइरसले छोएको छैन ।
