काठमाडौँ, ४ फागुन । चीनको वुहान शहरबाट उद्धार गरेर ल्याइएका १७५ जना नेपाली नेपाल आई पुगेका छन् । उद्धार गरेका सबैलाई त्रिभुवन अन्तर्राष्ट्रिय विमानस्थलमा स्वास्थ्य परीक्षण गर्दा उनीहरूमा कुनै समस्या नदेखिएपछि सिधै भक्तपुरको खरिपाटीस्थित क्वारेन्टाइनमा पुर्याइएको छ ।
कोरोना भाइरस (कोभिड–१९) सङ्क्रमणको उद्गमस्थलबाट ल्याइएकाले उनीहरू सबैलाई कम्तीमा १४ दिनसम्म खरिपाटीस्थित नेपाल विद्युत् प्राधिकरणको तालिम केन्द्रमा बनाइएको क्वारेन्टाइनमा राखिने जनाइएको छ ।उद्धार गरिएकाहरूलाई विमानस्थलबाट खरिपाटीसम्म पुर्याउन पाँच वटा बस र एउटा एम्बुलेन्स प्रयोग गरिएको थियो । खरिपाटीमा राष्ट्रिय प्रयोगशालाका स्वास्थ्यकर्मीहरुले उनीहरूको नमुना परीक्षण गर्नेछन् । नमुना परीक्षण गर्दा कुनै शङ्का लागेमा उनीहरूलाई विभिन्न अस्पतालमा बनाइएको आइसोलेसन वार्डमा राखेर उपचार गरिने अधिकारीहरूले बताएका छन् ।
वुहानबाट नेपाल फर्किएकाहरूमा १७० जना विद्यार्थी, एक जना कामदार, दुई जना पर्यटक तथा दुई जना नाबालक रहेको बेइजिङस्थित नेपाली दूतावासले जनाएको छ । ६ जनामा भने ज्वरो देखिएको भन्दै चीनले वुहान विमानस्थलमै रोकेको छ । तीन जना भने नेपाल फर्कन इच्छा नदेखाएर वुहानमै बसेका दूतावासले जनाएको छ ।
