काठमाडौँ, १ फागुन । कुवेतस्थित अलमुतलायामा रहेको ढुङ्गा, बालुवा खानीमा बम विष्फोट हुँदा चार नेपाली श्रमिकको ज्यान गएको छ । घटनामा अन्य धेरै नेपाली श्रमिक हताहत भएको आशंका गरिएको छ ।
खानीमा बम विष्फोट गराई ढुङ्गा फुटाउने क्रममा धेरै श्रमिक पुरिएको अरब टाइम्सले उल्लेख गरेको छ ।घटनास्थलबाट ६ जनाको शव निकालिएको छ । उनीहरूको परिचय सार्वजनिक भएको छैन । समाचारमा जनाइए अनुसार शव प्राप्त भएकामध्ये चार जना नेपाली श्रमिक रहेको छ । १३ नेपाली र एक भारतीय नागरिक दुर्घटनामा परेको आशंका छ । तीन जना घाइते भएका छन् । घाइतेको स्थानीय जहान अस्पतालमा उपचार भइरहेको छ । खाडलमा चिनियाँ कामदार पनि काम गरिरहेको जनाइएको छ ।
श्रमिकहरू खाडलमै भएका बेला ढुङ्गा फुटाउन बम विस्फोट गरिएको अरब टाइम्सले खबर छापेको छ । स्थानीय सुरक्षाकर्मीले दुर्घटनामा परेका कामदारको यकिन सङ्ख्या सार्वजनिक गरेको छैन । घटनास्थलमा सुरक्षाकर्मी उद्धारमा खटिएका छन् ।
कुवेतका सार्वजनिक निर्माण तथा आवास मामिला राज्यमन्त्री डा. राणा अल फरिसले घटनाको छानबिन गर्न आदेश दिइसकेको जनाइएको छ ।
