बेइजिङ, २७ माघ । कोरोना भाइरसबाट मृत्यु हुनेको सङ्ख्या ९०४ पुगेको र २९ हजार ६३१ जनामा कोरोना सङ्क्रमण भएको पुष्टि भएको छ । बिबिसीका अनुसार चिनमा ९०२ जनाले कोरोनाबाट ज्यान गुमाएको छ भने फिलिपिन्समा एक र हङकङमा एक जनाले ज्यान गुमाएको छ ।
पछिल्लो २४ घण्टामा मात्र २ हजार ६ सय १८ जनामा सङ्क्रमण पुष्टि भएको हो । यसैबिच हङकङको एउटा पानीजहाजमा कोरोना सङ्क्रमणको आशँकामा पाँच दिनदेखि रोकिएका यात्रुलाई जहाजबाट उत्रन अनुमति दिइएको छ । जहाजमै गरिएको परीक्षणबाट उनीहरूमा कोरोना सङ्क्रमण नभएको पुष्टि भएपछि जहाजबाट उत्रन अनुमति दिइएको बिबिसीले जनाएको छ ।
जहाजमा कोरोना सङ्क्रमित पनि रहेको आशंकामा तीन हजार ६ सय यात्रु र चालक दलका सदस्यलाई जहाजबाट उत्रन रोक लगाइएको थियो । जापानमा यस्तै एउटा जहाजमा रहेका यात्रु भने ६ दिनदेखि डाक्टरको निगरानीमा छन् । एक जना कोरोना सङ्क्रमित जहाजमा रहेको पाइएपछि जहाजका सबै तीन हजार सात सय नागरिकलाई क्वारेन्टाइनमा राखिएको जनाइएको छ ।
