काठमाडौँ । तिब्बतको सिजाङ क्षेत्रबाट आएको आकस्मिक बाढीले भोटेकोशी र त्रिशूली नदी आसपासमा ठूलो जनधनको क्षति पुर्याएपछि प्रभावित नागरिकको उद्धार, राहत तथा पुनःस्थापनाका लागि अन्तर्राष्ट्रिय सहयोग जुट्न थालेको छ । यसैक्रममा रेडक्रस तथा रेडक्रिसेन्ट सोसाइटीहरूको अन्तर्राष्ट्रिय महासङ्घले नेपाल रेडक्रस सोसाइटीमार्फत प्रभावित नागरिकका लागि करिब १९ करोड रुपैयाँ बराबरको आपत्कालीन सहयोग उपलब्ध गराउने भएको छ ।
महासङ्घले विपद् प्रतिकार्य आपत्कालीन कोषमार्फत १२ लाख अमेरिकी डलर अर्थात् करिब १८ करोड ९६ लाख रुपैयाँ बराबरको रकम परिचालन गर्ने जनाएको छ । उक्त रकम बाढी प्रभावित नागरिकको तत्काल खोज तथा उद्धार, राहत वितरण र पुनःस्थापनाका लागि प्रयोग गरिनेछ ।
बाढीबाट विशेषगरी रसुवाको भोटेकोशी क्षेत्र नराम्ररी प्रभावित भएको छ। बाढीले घर, सडक, पुल, जलविद्युत् आयोजना तथा अन्य भौतिक संरचनामा ठूलो क्षति पुर्याएको छ । कतिपय क्षेत्रमा सडक तथा पुल बग्दा प्रभावित बस्ती बाहिरी सम्पर्कबाट समेत विच्छेद भएका छन् । यसले उद्धार तथा राहत सामग्री पुर्याउने कार्यलाई थप चुनौतीपूर्ण बनाएको छ ।
बाढीपछि नेपाल रेडक्रसका आपत्कालीन प्रतिकार्य टोली तथा स्वयंसेवकहरू प्रभावित क्षेत्रमा परिचालित भएका छन् । उनीहरूले खोज तथा उद्धारसँगै प्रारम्भिक राहत वितरण, प्राथमिक उपचार र प्रभावित परिवारको आवश्यकताबारे विवरण सङ्कलन गर्ने काम गरिरहेका छन् ।
अन्तर्राष्ट्रिय महासङ्घका महासचिव जगन चापागाईंले भोटेकोशी बाढीबाट भएको जनधनको क्षतिप्रति दुःख व्यक्त गर्दै प्रभावित समुदायसम्म तत्काल मानवीय सहायता पुर्याउन आर्थिक सहयोग उपलब्ध गराइएको बताएका छन् । नेपाल रेडक्रस तथा सम्बन्धित सरकारी निकायसँगको समन्वयमा आवश्यकताअनुसार थप सहायता परिचालन गर्न महासङ्घ तयार रहेको उनको भनाइ छ ।
बाढीका कारण कैयौँ नागरिकको ज्यान गएको छ भने धेरै मानिस अझै बेपत्ता रहेका छन् । ठूलो संख्यामा परिवार विस्थापित भएका छन्। घटनापछि नेपाली सेना, नेपाल प्रहरी, सशस्त्र प्रहरी तथा स्थानीय उद्धार टोली खोज तथा उद्धारमा सक्रिय छन् । यद्यपि, बाढीले पुर्याएको क्षतिको पूर्ण विवरण भने उद्धार तथा खोजी कार्य जारी रहेकाले अझै सङ्कलनकै क्रममा रहेको छ ।
भोटेकोशीमा आएको बाढीको प्रभाव त्रिशूली नदी प्रणालीसम्म समेत परेको छ । नदीको बहाव बढेसँगै तटीय क्षेत्रका बस्तीमा जोखिम बढेपछि स्थानीयवासीलाई सतर्क रहन आग्रह गरिएको छ । बाढीले सडक, पुल र सञ्चार संरचनामा क्षति पुर्याउँदा कतिपय प्रभावित क्षेत्रमा उद्धार तथा राहत पुर्याउन कठिनाइ भइरहेको छ ।
यस्तो विपद्को घडीमा तत्कालीन राहतसँगै विस्थापित परिवारका लागि सुरक्षित आवास, खाद्यान्न, स्वच्छ खानेपानी, स्वास्थ्य सेवा, सरसफाइ तथा मनोसामाजिक सहयोगको आवश्यकता बढेको छ । त्यसैले सरकारी निकायसँगै राष्ट्रिय तथा अन्तर्राष्ट्रिय मानवीय संस्थाहरूबीच प्रभावकारी समन्वय आवश्यक देखिएको छ ।
महासङ्घको करिब १९ करोड रुपैयाँ बराबरको आपत्कालीन सहयोगले बाढीबाट प्रभावित नागरिकसम्म तत्काल मानवीय सहायता पुर्याउन तथा नेपाल रेडक्रसको प्रतिकार्यलाई थप प्रभावकारी बनाउन महत्वपूर्ण सहयोग पुग्ने अपेक्षा गरिएको छ । भोटेकोशीको बाढीले ठूलो विनाश निम्त्याए पनि विपद्को यस कठिन घडीमा उद्धारकर्मी, स्वयंसेवक, स्थानीय समुदाय, सरकारी निकाय तथा अन्तर्राष्ट्रिय मानवीय संस्थाहरूको संयुक्त प्रयासले पीडित परिवारमा राहत र आशा पुर्याउने प्रयास जारी छ ।
