काठमाडौँ । नेकपा एमालेको महाधिवेशन प्रतिनिधि छनोट प्रक्रिया धनकुटामा तनावपूर्ण बनेको छ । एकलौटी निर्णय गरिएको आरोप लगाउँदै असन्तुष्ट समूहले निर्वाचन बहिष्कार गर्नुका साथै केही मतदान बुथमा तोडफोडसमेत गरेको छ। सर्वसम्मत सहमति नबनेका स्थानमा आज निर्वाचन हुँदै आएको भए पनि धनकुटामा प्रक्रिया तीव्र विवादमा फसेको हो ।
धनकुटामा राजेन्द्र राई र इन्द्रमणी पराजुली पक्ष गरी दुई समूहबिच लामो समयदेखि प्रतिद्वन्द्विता रहेको छ । इन्द्रमणी समूहले मतदातालाई जानकारी नदिई एकलौटी ढङ्गले निर्वाचन अघि बढाइएकाले आफूहरू बहिष्कार गर्न बाध्य भएको आरोप लगाएको छ । उनीहरूका अनुसार निर्वाचन अधिकारीसमेत राई पक्षबाटै मनोनीत भएको जानकारी पछि विवाद झन् चर्किएको हो ।
पराजुली पक्षका नेता इन्द्रमणी पराजुलीका अनुसार हिजो साँझ ९/४ को अनुपातमा सहमति जुटेको थियो, जसअनुसार राई पक्षबाट ९ र अन्य समूहबाट ४ जना प्रतिनिधि पठाउने निर्णय भएको थियो । तर आज बिहान चार जना बाहेक सबैले मनोनयन फिर्ता लिएपछि प्रक्रिया एकतर्फी रूपमा अघि बढाइयो भन्ने उनीहरूको दाबी छ ।
तर राजेन्द्र राईले भने सर्वसम्मत सहमति नजुटेकाले नियमअनुसार निर्वाचन प्रक्रिया सुरु गरिएको बताउँदै पराजय निश्चित भएको अनुभूति भएपछि इतर समूहले अराजकता सिर्जना गरेको आरोप लगाए । उनले प्रतिनिधि छनोट प्रक्रियालाई व्यवस्थित रूपमा अघि बढाइरहँदा प्रतिपक्षले बदनियतपूर्वक वातावरण बिगारेको दाबी गरे ।
