कानेपोखरी । “अब त पानी पर्दा छाना चुहिँदैन, आफ्नै कोठामा सुरक्षित निदाउन पाइन्छ”, शनिवार कानेपोखरी गाउँपालिकाले हस्तान्तरण गरेका नयाँ घरमा पस्दा विपन्न परिवारका अनुहारमा झल्किएको खुसीको भाव यही थियो ।
गाउँपालिका, साहारा नेपाल र हेभिटाट फर ह्युमानिटी नेपालको सहकार्यमा बनेका ४१ वटा पक्की आवास शनिवार औपचारिक समारोहबिच लाभग्राही परिवारलाई हस्तान्तरण गरिएको हो । वडा नं. १ को झरनाघुटुमा ११ र वडा नं. ३ को कोलटोलमा ३० घर बनेका छन् । दुई कोठे संरचनासहित भान्सा र शौचालय रहेको यी आवास प्रशोधित बाँस, ढलान गरिएको भुईँ र टिनको छानाले सुसज्जित छन् । प्रत्येक घरको लागत करिब पाँच लाख ५६ हजार रुपैयाँ र कुल लागत दुई करोड २८ लाख रुपैयाँभन्दा बढी भएको गाउँपालिकाले जनाएको छ ।
गाउँपालिका अध्यक्ष राजमति इङनाम, प्रतिनिधिसभा सदस्य तथा सार्वजनिक लेखा समितिका सभापति ऋषिकेश पोखरेल र प्रदेश सांसद लिलाबल्लभ अधिकारीले संयुक्त रूपमा चाबी हस्तान्तरण गर्दै घरको उद्घाटन गरेका थिए । अध्यक्ष इङनामले आफ्नो कार्यकालमा हालसम्म १२२ घर हस्तान्तरण गरिसकेको जानकारी दिँदै भनिन्, “कालोपत्रे सडक भएर पनि घर नभएकाले स्थानीय खुसी थिएनन् । त्यसैले बाटोसँगै घर पनि हुनुपर्छ भन्ने सोचले यो अभियानलाई निरन्तर अघि बढाएकी हुँ ।” उनका अनुसार वडा नं. १ मा ३०, वडा नं. ३ मा ६० र वडा नं. ४ मा १७ घर निर्माण भइसकेका छन् । प्रदेश सरकारसँग सहकार्यमा थप ३४ घर तयार भइसकेको र निकट भविष्यमा ५० घर बनाउन लागिएको पनि उनले जानकारी दिइन् ।
ममतादेवी ऋषिदेवले भनिन्, “पहिले झुप्रीमा बस्थ्यौँ, पानी परे चुहिन्थ्यो । अहिले राम्रो घर पाएका छौँ, अध्यक्ष दिदीलाई धेरै धन्यवाद ।” त्यस्तै शितल मुरमुरले आफ्नो अनुभव सुनाउँदै भन्छन्,, “हाम्रो गाउँ झुपडीको गाउँ जस्तो थियो, हामीले आफै बनाउनै सक्दैनथ्यौँ । अब त गाउँमै नयाँ जीवन सुरु भएको छ ।”
समारोहमा प्रमुख अतिथि सांसद पोखरेलले विपन्नलाई आश्रय प्रदान गर्दै गाउँपालिकाले नागरिकलाई सम्मानपूर्वक बाँच्ने वातावरण सिर्जना गरेको भन्दै धन्यवाद ज्ञापन गरे । प्रदेश सांसद अधिकारीले यस्तो पहल अन्य स्थानीय तहका लागि पनि अनुकरणीय हुने उल्लेख गरे । उपाध्यक्ष भोलाप्रसाद अधिकारी, प्रमुख प्रशासकीय अधिकृत हिरा कुमारी यादव, वडा अध्यक्षहरू चरण गुरुङ, रत्नबहादुर कार्की, रमेश राउत, गोपालबहादुर कार्की लगायतको उपस्थिति रहेको कार्यक्रममा गाउँपालिका प्रशासन अधिकृत मचिन्द्र लिम्बुले सञ्चालन गरेका थिए ।
यससँगै कानेपोखरी गाउँपालिकाले विपन्न परिवारलाई केवल आवास मात्र दिएको छैन, सुरक्षित र सम्मानजनक जीवनको नयाँ ढोका पनि खोलेको छ । शनिवारको दिन, लाभग्राही परिवारका लागि केवल चाबी हातमा पाएको दिन थिएन, त्यो त जीवनकै नयाँ अध्याय सुरु भएको ऐतिहासिक क्षण थियो ।
फोटो फिचर : शिशिर राई
