शिशिर राई – बेलबारी । तेस्रो सिसौली नकआउट फुटबल प्रतियोगिता–२०८२ को उपाधि आयोजक सिसौली यूथ क्लबले जितेको छ । बेलबारी नगरपालिका–१ स्थित बर्राडागी खेल मैदानमा भदौ ७ गतेदेखि सुरु भएको प्रतियोगिताको फाइनल खेल शनिवार सम्पन्न भएको हो ।
फाइनलमा आयोजक टिम ‘ए’ले घङ्गरु फुटबल क्लबलाई ५–१ गोल अन्तरले पराजित गर्दै उपाधि चुमेको हो । खेलको सुरुवातमै आक्रामक बनेको सिसौलिले ३ मिनेटमै अमित भेस्राको गोलमार्फत अग्रता लिएको थियो । त्यसपछि १५औँ मिनेटमा सुशील राईले तथा ३२औँ मिनेटमा पुनः अमितले गोल गर्दै पहिलो हाफमै टिमलाई ३–० ले अगाडि बढाए ।
दोस्रो हाफमा घङ्गरुको तर्फबाट ६५औँ मिनेटमा दिवस श्रेष्ठले एक मात्र गोल फर्काए पनि ७०औँ मिनेटमा विशाल भण्डारीले थप गोल गर्दै ४–१ को अवस्था बनाए । त्यसपछि ७६औँ मिनेटमा विशालले पुनः गोल गर्दै सिसौलिलाई ५–१ को शानदार जित दिलाए ।
विजेता सिसौली यूथ क्लबले नगद १ लाख रुपैयाँ प्राप्त गर्दा उपविजेता घङ्गरु क्लबले ५० हजार रुपैयाँमा चित्त बुझाउनुपर्यो । खेलमा सिसौलीका विशाल भण्डारी ‘म्यान अफ द म्याच’ घोषित भए भने प्रतियोगिताको सर्वोत्कृष्ट खेलाडी सुशील राई बने । सर्वाधिक गोलकर्ताको उपाधि अमित भेस्राले पाए । यसै गरी, उत्कृष्ट गोलकिपर मुस्कान लिम्बु, उत्कृष्ट डिफेन्स सुजन चौधरी, उत्कृष्ट मिडफिल्डर विवश गुरुङ, उत्कृष्ट प्रशिक्षक खगेन्द्र राई र राइजिङ प्लेयर एलोन धिमाल घोषित भए । उत्कृष्ट फरवार्डको उपाधि भने घङ्गरुका रोशन गुरुङले हात पारे ।
प्रतियोगिताको फाइनल खेल र समापन समारोहमा बेलबारी नगरपालिकाका नगर प्रमुख दिल प्रसाद राई प्रमुख अतिथि रहेका थिए । कार्यक्रममा धिमाल जाति विकास केन्द्रकी उपाध्यक्ष रुकमणी धिमाल, नेकपा एमाले बेलबारी अध्यक्ष शंकर गुरुङ, जसपा बेलबारी अध्यक्ष अमिर मगर, वडा नं.१ का अध्यक्ष मणि मगर, नेपाल फुटबल संघ कोशी प्रदेशका सदस्य रसिन लामा, काँग्रेस बेलबारी–३ का सभापति रिक्त गुरुङ, उद्योग वाणिज्य संघ बेलबारीका वरिष्ठ उपाध्यक्ष सन्दीप राईलगायतको उपस्थिति थियो ।
समापन समारोह सिसौली यूथ क्लब, बेलबारी–१ का अध्यक्ष सुमन धिमालको अध्यक्षतामा सम्पन्न भएको हो ।
