बेलबारी । बेलबारी नगरपालिकाले शिक्षा क्षेत्रमा प्रविधि मैत्री वातावरण निर्माण गर्ने उद्देश्यले सामुदायिक विद्यालयहरूलाई कम्प्युटर र स्मार्ट बोर्ड वितरण गरेको छ। शुक्रवार नगरपालिकाले आयोजना गरेको एक औपचारिक समारोहमार्फत २० विद्यालयलाई ३८ थान डेस्कटप कम्प्युटर र ४ थान स्मार्ट बोर्ड हस्तान्तरण गरिएको हो।
नगर शिक्षा शाखाका अनुसार उक्त सामग्रीको मूल्य करिब ३५ लाख ९९ हजार ९ सय २५ रुपैयाँ बराबर पर्छ। सङ्घीय सरकारको सशर्त समपूरक विशेष अनुदानमार्फत प्राप्त बजेट प्रयोग गरी विद्यालयहरूलाई प्रविधिमैत्री बनाउन यो कार्यक्रम कार्यान्वयन गरिएको नगरप्रमुख दिल प्रसाद राईले जानकारी दिए।
कार्यक्रममा बोल्दै नगरप्रमुख राईले शिक्षा क्षेत्रको विकासमा प्रविधि र भौतिक पूर्वाधार अत्यावश्यक भएको उल्लेख गर्दै बेलबारीका सबै विद्यालयमा अझै पर्याप्त शैक्षिक सामग्री पुर्याउन नसकिएको बताए। उनले हाल धेरै विद्यालयहरूमा टिनको छानो भएकाले वर्षामा चुहिने र घाममा अत्यधिक तात्ने समस्या देखिने गरेको उल्लेख गर्दै पक्की भवन निर्माणलाई प्राथमिकतामा राखेको बताए।
बेलबारीमा रहेका कतिपय विद्यालयमा उपलब्ध कम्प्युटरहरू प्रभावकारी रूपमा प्रयोगमा नआएकोप्रति उनले चासो व्यक्त गर्दै, वितरण गरिएका उपकरणहरूको अधिकतम सदुपयोग गरेर शैक्षिक गुणस्तर वृद्धि गर्न शिक्षक र विद्यालय व्यवस्थापन समितिलाई आग्रह गरे।
कार्यक्रममा बेलबारी नगरपालिका वडा नं.६ का अध्यक्ष टेकबहादुर राई, वडा नं.७ का अध्यक्ष सुनिता चौधरी, विद्यालय व्यवस्थापन समितिका प्रतिनिधि, शिक्षक लगायतको उपस्थिति रहेको थियो ।
