नवलपुर, दुम्किवास । पूर्व–पश्चिम राजमार्गअन्तर्गत विनयी खोलामा बनाइएको अस्थायी डाइभर्सन बगाउँदा यातायात पूर्णरूपमा अवरुद्ध बनेको छ। बिहीबार बिहानको अकस्मात बाढीले डाइभर्सन बगाएपछि राजमार्गको आवागमन ठप्प बनेको हो।
जिल्ला प्रहरी कार्यालय, नवलपुरका प्रवक्ता डीएसपी मधु नेपालका अनुसार, बाढीका कारण खोलामाथि बनाइएको डाइभर्सन बगाएर सवारी सञ्चालन असम्भव भएको छ।
पाँच महिनादेखि भासिएको पुल, अस्थायी डाइभर्सनको भर
विनयी खोलामाथिको पुल पाँच महिनाअघि भासिएपछि त्यसको मर्मत नहुँदासम्मको लागि डाइभर्सन निर्माण गरेर सवारी आवागमन सञ्चालन हुँदै आएको थियो। तर वर्षा हुनेबित्तिकै डाइभर्सन बहन गर्ने समस्या दोहोरिँदै आएको प्रहरीले जनाएको छ।
यस पटक पनि बाढीले डाइभर्सन बगाइदिएपछि मालवाहक गाडीहरू रोकिएका छन् भने यात्रुवाहक र साना सवारीहरूलाई होङ्सी गेट–सर्दी मार्ग हुँदै वैकल्पिक रूपमा चलाइएको छ। यो बाटो करीब २५ किलोमिटर लामो घुमाउरो रहेको छ, जसले यात्रुलाई थप समय र सास्ती दुबै बढाएको छ।
प्रहरीका अनुसार खोलामा पानीको सतह घटेपछि डाइभर्सन पुनः निर्माण गर्ने तयारी थालिएको छ। यद्यपि, स्थायी पुलको मर्मतमा लापरवाही हुँदा वर्षाको सिजनमा बारम्बार सडक अवरुद्ध हुने अवस्था उत्पन्न भइरहेको स्थानीयको गुनासो छ।
जनजीवन प्रभावित
पूर्व–पश्चिम राजमार्ग अवरुद्ध हुँदा देशको पूर्वी र पश्चिमी भू–भाग जोड्ने मुख्य यातायात मार्गमा अवरोध सिर्जना हुनुका साथै यात्रु, व्यापारी र मालवाहक व्यवसायीहरू गम्भीर समस्यामा परेका छन्।
स्थायी समाधान नभएसम्म साना वर्षा पनि बाढीको त्रास र राजमार्ग अवरोधको कारण बन्ने देखिएको छ। तत्कालीन रूपमा डाइभर्सन मर्मतको काम भइरहे पनि स्थानीयवासी र यात्रुहरू स्थायी पुल मर्मतको अपेक्षामा छन्।
