काठमाडौं । काठमाडौँको तीनकुनेमा राजावादीले सुरक्षाकर्मीको बोकेको बन्दुक खोसेका छन् । तीनकुनेमा राजावादीको प्रदर्शनले उग्र बनेको छ । प्रदर्शनकारीले प्रहरीले अश्रुग्याँस प्रहार गर्ने ग्यास गन (बन्दुक) नै खोसेका छन्।
राजावादी समर्थकलाई प्रदर्शन गर्न काठमाडौँ प्रशासनले तीनकुने क्षेत्र तोकेको थियो । तर, प्रदर्शनकारीले प्रहरीको घेरा तोडेर बानेश्वतर्फ अघि बढेपछि प्रहरीले रोक्ने प्रयास गरेको थियो । प्रहरीले रोकेपछि प्रदर्शनकारीले उनीहरूमाथि नै ढुंगामुढा प्रहार गरेका थिए ।
प्रहरीमाथि आक्रमण हुन थालेपछि अश्रुग्याँस र पानीको फोहोरा प्रहार गरिएको थियो । प्रहरीले अश्रुग्याँस प्रहार गर्न प्रयोग गर्ने गन नै प्रदर्शनकारीले खोसेर भागेका छन् । तीनकुनेमा प्रदर्शनकारीले व्यक्तिको घरमा ढुंगामुढा गर्नुका साथै आगजनी पनि गरेका छन् ।
