मोरङ । सत्तारुढ नेकपा एमालेका उपाध्यक्ष रामबहादुर थापा ‘बादल’ ले नेपाली काँग्रेस, नेकपा माओवादी केन्द्र, मधेस केन्द्रित दल कसैले पनि मुलुकको अवस्था बदल्न नसक्ने दाबी गरेका छन् । एमाले मोरङको १० औँ जिल्ला अधिवेशनको प्रमुख अतिथि बनेका बादलले एमाले मात्रै क्रान्तिकारी पार्टी भएको र एमालेको नेतृत्वमा मात्रै मुलुकका तमाम समस्याको समाधान सम्भव हुने बताए ।
‘नेपाली काँग्रेस क्रान्तिकारी पार्टी हो ? उसको इतिहासले देखाउँदैन । नेकपा माओवादी केन्द्र नेपालको अवस्थालाई बदल्ने पार्टी हो ? होइन । उसको नीतिले, विचारले र नेतृत्वले यो कुरालाई पुष्टि गर्दैन’ बादलले भने, ‘यी सबै पार्टी अस्थिरतावादी, अवसरवादी हुन् । यिनले नेपालको अवस्था बदल्न सक्दैनन् । नेपालमा समाजवाद स्थापना गर्न सक्दैनन् ।’
राजावादी, मासान्तवादी विचार बोक्ने र नयाँ भनेर खुलेका पार्टीले पनि अहिलेको अवस्थालाई बदल्न नसक्ने जिकिर गर्दै उनले एमालेले मात्र क्रान्तिकारी पार्टी भएको दाबी गरेका छन् । ‘यिनीहरूले मुलुकको आर्थिक असमानता, गरिबी र समृद्धबिचको खाडल पुर्न सक्छन् ? सक्दैनन्,’ उनले भने, ‘एमालेको नेतृत्वमा मात्र यो सम्भव छ ।’ उनले एमालेलाई निर्णायक राष्ट्रिय शक्ति बनाउनुपर्नेमा जोड दिए ।
