मोरङ । सत्तारुढ नेपाली काँग्रेस निकट विद्यार्थी सङ्गठनका दुई समूहबिच विराटनगरमा झडप भएको छ । विराटनगरस्थित महेन्द्र मोरङ क्याम्पसमा दुई पक्षबिच झडप हुँदा दुई जना विद्यार्थी घाइते भएका छन् ।
झडपमा परेर नेविसंघ सभापति सरोज पोखरेल र आयुष दाहाल घाइते भएका छन् । उनीहरूको विराटनगरस्थित नोबेल मेडिकल कलेजमा उपचार भइरहेको छ । नेविसंघ मोरङका सभापति सरोज पोखरेल र चुले भाइ भनिने आयुष दाहालसहितको टोली क्याम्पस इकाई गठन गर्न भन्दै बिहीबार बिहानै क्याम्पस पुगेका थिए ।
क्याम्पसमा इकाई कमिटी गठन गर्न लागेको भन्दै स्ववियु सभापति समेत रहेका जसवन्त पौडेलको समूहले बन्चरो, तरबार र लाठीले प्रहार गरेको हो । घटनाको बारेमा अनुसन्धान भइरहेको प्रहरीले जनाएको छ । कुट्ने र कुटाइ खाने दुवै नेविसङ्घकै नेता हुन् । तर, उनीहरूको गुट फरक छ । कुट्ने स्ववियु सभापति पौडेल काँग्रेस संस्थापन पक्ष र कुटिने पोखरेल डा. शेखर कोइराला पक्षका हुन् ।
