बेलबारी । बेलबारी नगरपालिका वडा नं.११, लक्ष्मीमार्गमा श्रीमद्भागवत महापुराण धन धान्याञ्चल सप्ताह धार्मिक ज्ञान महायज्ञ हुने भएको छ । श्री दुर्गादेवी मन्दिर मूल पुराण समिति साथै उपसमितिहरूको आयोजना साथै पूर्वाञ्चल पर्यटन विकास संस्था प्रा.लि केन्द्रीय कार्यालय रतुवामाई १०, मोरङको सहयोगमा फागुन ७ गते देखी महापुराण हुन लागेको हो ।
मङ्गलवार पत्रकार सम्मेलन गर्दै आयोजक समिति तथा सहयोगी संस्थाले लक्ष्मीमार्गमा अवस्थित श्री दुर्गादेवी मन्दिरको पुनः निर्माण साथै सर्वाङ्गीण विकासको लागि महापुराण हुन लागेको जनाएको छ । १५ गते सम्म महापुराण हुने श्री दुर्गादेवी मन्दिर मूल पुराण समितिका अध्यक्ष बलराम कार्कीले जानकारी दिएका छन् ।
पूर्वाञ्चल पर्यटन विकास संस्था प्रा.लि अध्यक्ष यमनाथ डंगालले पहिलो दिन कलश यात्रा गरेर सुरुवात हुने बताएका छन् । साथै पुराणमा निमन्त्रणा पनि गरेका छन् । श्री दुर्गादेवी मन्दिर सञ्चालक समितिका अध्यक्ष ललित बहादुर भण्डारीका अनुसार पूर्वाञ्चल पर्यटन विकास संस्था प्रा.लिले पुराणको लागि सबै आर्थिक व्यवस्थापन गरेको छ । मन्दिर पुनः निर्माणको लागि प्रदेश सरकारबाट पनि रु.१५ लाख सहयोग हुने भण्डारीले बताए ।
पुराणको आर्थिक संयोजक शिव राईले श्री दुर्गादेवी मन्दिरले लामो इतिहास बोकेकोले संरक्षणको लागि पुनः निर्माण गर्नै पर्ने भएकोले सक्ने आर्थिक सहयोगको लागि अपिल पनि गरेका छन् । सञ्चालक समितिका सचिव सूर्य अधिकारीले रु.१ हजार १ सय लिएर आजीवन सदस्य लिन सकिने र रु.३ हजार १ सय दान गर्नेहरूको नाम शिलालेखमा लेखिने पनि जानकारी गराएका छन् । डागिहाट शाखाको ग्लोबल आइ.एम.ई बैङ्कमा श्री दुर्गादेवी सञ्चालक समितिको खाता नं.एन७०१०१०००००५९ मा रकम जम्मा गर्न पाउने सुविधा पनि रहेको अधिकारीले जनाएका छन् ।
उद्घाटन कार्यक्रम दुई चरणको हुने आयोजकले जनाएका छन् । पहिलो चरणमा प्यावसन मोरङका अध्यक्ष जगत बस्नेतको प्रमुख आतिथ्यमा कलश पूजा कार्यक्रम हुने छ भने दोस्रो चरणमा प्रदेश सांसद ज्ञानेन्द्र सुवेदीद्वारा मण्डप पूजाको समुद्घाटन हुने छ ।
