मोरङ । बेलबारीका लेखक तथा पत्रकार केशु विरहीले आफ्नो पछिल्लो कृति ‘उपद्रष्टा हर्कमान तामाङ’ को बिक्रीबाट प्राप्त भएको रकमले बेलबारी बहुमुखी क्याम्पसमा अनुसन्धान अक्षयकोष निर्माण गर्ने बताएका छन् । अक्षयकोष निर्माण तथा आगामी कृतिको लोकार्पणबारे जानकारी दिने उद्देश्यले बेलबारी बहुमुखी क्याम्पसमा आयोजित पत्रकार सम्मेलनमा सो जानकारी गराएका हुन् ।
पत्रकार सम्मेलनमा बेलबारी साहित्य विकास समितिका अध्यक्ष रमेश निरौला, बेलबारी बहुमुखी क्याम्पसका प्रमुख भूपेन्द्रप्रसाद कोइराला तथा सीपीसीयस इन्टरनेसनलका पूर्व निर्देशक एवम् स्रष्टा नवराज पोखरेललगायतको उपस्थिति रहेको थियो । अनुसन्धानका क्षेत्रमा काम गर्दै आएका विरहीले विद्यार्थीहरूमा अनुसन्धानप्रति अभिप्रेरणा जगाउने उद्देश्यले अक्षयकोषको अवधारणा अघि सारेको बताए ।
पत्रकार सम्मेलनमा बोल्दै विरहीले भने, ‘म विगत केही सालदेखि नियमित रूपमा अनुसन्धानका काम गर्दै छु । अनुसन्धानका काममा विद्यार्थीलाई अभिप्रेरणा जगाउन सकिन्छ कि भनेर मैले व्यक्तिगत तवरबाटै भए पनि एउटा सानो प्रयासको थालनी गरेको छु ।’ बेलबारीका अग्रज स्रष्टा, शैक्षिक व्यक्तित्व, पूर्व सांसद हर्कमान तामाङको जीवनीमूलक कृति ‘उपद्रष्टा हर्कमान तामाङ’ नामक कृति प्रकाशित भएको, यही कृतिलाई बिक्री गरेर आएको पचास प्रतिशत रकमले बेलबारी बहुमुखी क्याम्पसमा अनुसन्धान अक्षयकोष खडा गर्ने र त्यसको ब्याजबाट प्राप्त हुने रकमले बेलबारीलाई अध्ययन गर्ने कम्तीमा एक जना विद्यार्थीलाई वार्षिक रूपमा पुरस्कृत गरिने विरहीले बताए ।
बेलबारी साहित्य विकास समितिका अध्यक्ष रमेश निरौलाले राजनीतिका आदर्श, शैक्षिक अगुवा, अग्रज स्रष्टा तथा पूर्व सांसदसमेत रहेका व्यक्तिको जीवनी लेखन आफैँमा स्वागतयोग्य काम भएको बताउँदै फागुन ७ गते बुधवारका दिन एक विशेष कार्यक्रमको आयोजना गरेर कृतिको लोकार्पण गरिने बताए । बेलबारी बहुमुखी क्याम्पसका प्रमुख भूपेन्द्रप्रसाद कोइरालाले यस कार्यले विद्यार्थीमा अनुसन्धानप्रति आकर्षण पैदा गर्ने बताउँदै एउटा महत्त्वपूर्ण कार्यको थालनी गरेकामा लेखलाई बधाईसमेत दिए ।
नेपाली साहित्यका कथा, उपन्यास, गजल, बालकथा, अनुसन्धान तथा समालोचनाका क्षेत्रमा कलम चलाउँदै आएका विरहीका यस अघि नै ‘कहाली लाग्दा गोरेटाहरू’ (उपन्यास –सह लेखन) २०५६, ‘आमाको माया’ (उपन्यास) २०५७, ‘सुस्केरा (सामूहिक सङ्कलन) २०६२, ‘दन्किएको आगो (गजलसङ्ग्रह) २०६३, ‘भास्कर वंशावली (वंशावली) २०६५, ‘सुलोचना (कथासङ्ग्रह) २०७१, ‘रेस्माको सेन्डल’ बालकथासङ्ग्रह (२०७७) र ‘बेलबारीको साहित्यिक इतिहास’ (२०७९), ‘तेह्रथुमको साहित्यिक इतिहास’ (२०८०) जस्ता कृतिहरू बजारमा ल्याइसकेका छन् ।
