बेलबारी । तेस्रो बेलबारी नगरपालिका वडा नं.१० टोलस्तरीय फुटबल प्रतियोगिताको उपाधि पुष्पाञ्जली टोलले चुमेको छ । नमुनालाई १-० गोलको अन्तरले पराजित गर्दै उपाधि हात पारेको हो ।
पुष्पाञ्जलीका खेलाडी जर्सी नं.७ का सविन राईले खेलको ४१ मिनेटमा गोल गरे । सोही गोल नै निर्णायक बन्न पुग्यो । नमुनाको पुष्पाञ्जलीसँग निकै प्रतिस्पर्धात्मक खेल भए पनि गोल फर्काउन नसक्दा उपविजेतामा चित्त बुझाउनु परेको छ ।
विजेताले ट्रफी, मेडल, प्रमाणपत्रसहित नगद पुरस्कार रु. ३० हजार र उपविजेताले ट्रफी, मेडल, प्रमाणपत्रसहित नगद पुरस्कार रु. २० हजार प्राप्त गरेका छन् । मेन अफ द म्याच सविन राई नै घोषित भएका छन् ।
म्यान अफ द सिरिज नमुनाका मिहाङ राई, उत्कृष्ट गोलकिपर पुष्पाञ्जलीका उज्ज्वल राई, उत्कृष्ट डिफेन्डर सुवास पौडेल, उत्कृष्ट फरवार्ड र उच्च स्कोर सविन राई, उत्कृष्ट प्रशिक्षक निजन सुब्बा, उत्कृष्ट मिडफिल्डर नमुनाका जेनिल याखा र उदीयमान खेलाडी जनजागरणका रबिन सेन्चुरी घोषित भएका छन् ।
फाइनल खेल बेलबारी वडा नं.१० का अध्यक्ष गंगा याक्खाको प्रमुख आतिथ्यमा र खेल संयोजक दुर्गा लिम्बुको अध्यक्षतामा सम्पन्न भएको हो । कार्यक्रमको सञ्चालन अमिर मगरले गरेका थिए ।
