काठमाडौं । असुरक्षाका कारण राजीनामा दिएर देश छाडेकी शेख हसिना नेतृत्वको पार्टी अवामी लिगका एक जिल्ला नेताको होटेलमा आगजनी हुँदा कम्तीमा २४ जनाको ज्यान गएको छ । अज्ञात व्यक्तिले अवामी लिग पार्टीका जेसोर जिल्ला महासचिव सहिन चकलादारको होटेलमा आगजनी गरेको बंगलादेशको दैनिक पत्रिका ढाका ट्रिब्यूनले लेखेको छ । त्यस क्रममा होटेलमा भएका अधिकांश मानिसहरू धुवाँमा निसास्सिएर ज्यान गएको समाचारमा उल्लेख छ । कम्तीमा २५ देखि ३० जनाको उद्धार गरिएको समाचारमा जनाइएको छ ।
होटेलमा सोमबार ४ बजेदेखि आगलागी भएको थियो भने ८ बजे नियन्त्रणमा आएको थियो । ज्यान गुमाउनेमध्ये एक जना इन्डोनेसियाका नागरिक भएको बंगाली भाषाको अखबार प्रथोम आलोले लेखेको छ । जेसोर अस्पतालका डा. प्रार्थो प्रतिम चक्रवर्तीले आगजनीका कारण घाइते १५० जनाको उपचार भइरहेको बताएका छन् । आरक्षणको विरोधमा भएको आन्दोलनले हिंसात्मक रूप लिँदा सोमबार प्रधानमन्त्री शेख हसिना राजीनामा दिएर देशै छाड्न बाध्य भएकी छिन् ।
उनी राजीनामा दिएर सैनिक हेलिकप्टरमा भारततर्फ गएकी छन् । लगत्तै सत्तारुढ पार्टी अवामी लिगका नेताका घर, होटेल लगायतमा भिडले आक्रमण गरेको थियो । प्रथोम आलो पत्रिकाका अनुसार, सतखिरामा भएको आक्रमणमा १४ जना मारिएका छन् । ज्यान गुमाउनेमा ५ जना सत्तारुढ अवामी लिग पार्टीका नेताका आफन्तहरू छन् ।
समाचारमा उल्लेख भएअनुसार हसिनाले देश छाडेको समाचार आए लगत्तै अवामी लिगका नेता जाकिर हुसेनको कल्याणपुरस्थित घरमा आक्रमण भएको थियो । त्यस क्रममा गोली समेत चलेको जनाइएको छ । भिडले सतखिरा सदर प्रहरी चौकी, ट्राफिक प्रहरी चौकी र श्यामनगर प्रहरी चौकीमा पनि आगजनी र तोडफोड गरेका छन् । स्थानीय प्रहरी कार्यालयमा प्रहरी अधिकारीहरू नभएकाले क्षतिको यकिन विवरण बाहिर नआएको समाचारमा उल्लेख गरिएको छ ।
बंगलादेशका प्रहरी प्रमुखले मङ्गलवार प्रहरी कानुनको पालक मात्र भएको भन्दै समस्या नेतृत्वमा भएकाले प्रहरीमाथि आक्रमण नगर्न आग्रह गरेका थिए । बंगलादेश प्रहरीका डिआइजी साहेन रानाले विद्यार्थी र आमनागरिकको हत्यामा संलग्नमाथि छानबिन हुने भन्दै सङ्गठनप्रति आक्रमण नगर्न समेत आग्रह गरेका छन् । यसैबिच बंगलादेशी सेनाको उच्च तहमा रहेका अधिकारीहरूको पनि जिम्मेवारी हेरफेर भएको ढाकाको पत्रिका डेली स्टारको समाचारमा उल्लेख छ ।
