रुपन्देही । रुपन्देहीमा गए राति मजदुरहरूबिच झडप हुँदा एक जनाको ज्यान गएको छ । घटनामा ३ जना गम्भीर घाइते भएका छन् ।
घटनामा संलग्न भएको आरोपमा प्रहरीले १३ जनलाई पक्राउ गरेको छ । उनीहरूमाथि सोधपुछ र थप अनुसन्धान भइरहेको प्रहरीले जनाएको छ । तिलोत्तमा नगरपालिका–९ स्थित एक रेस्टुरेन्टमा सोमबार साँझ मादक पदार्थसहितको भोज खाएपछि मजदुरहरूले आपसमा झगडा गर्दा घटना भएको प्रहरीले जनाएको छ । झडपको क्रममा धारिलो हतियार प्रहार हुँदा मकवानपुरको हेटौँडा घर भई रुपन्देहीको मंगलापुरमा डेरा गरी बस्दै आएका सुरेश स्याङ्तानको मृत्यु भएको जिल्ला प्रहरी कार्यालय रुपन्देहीका प्रमुख एसपी भरत विकले जानकारी दिए ।
‘मदिरा सेवनपछि धारिलो हतियारसहित उनीहरूले आपसमा झडप गर्दा एक जनाको मृत्यु भएको छ,’ एसपी विकले भने, ‘घटनामा धारिलो हतियार प्रहारबाट अन्य तीन जना घाइते छन् । घटनामा संलग्न भएको आशंकामा १३ जना पक्राउ परेका छन् ।’
इलाका प्रहरी कार्यालय बुटवलका डिएसपी दानबहादुर थापाका अनुसार तिलोत्तमा नगरपालिका ९ केरवानीमा विभिन्न पेटी ठेकेदारहरूसँग मजदुरी गर्दै आएका उनीहरू विश्वकर्मा पूजापछि साँझ मदिरासहितको भोजमा बसेका थिए । त्यस क्रममा उनीहरू आपसी झडपमा उत्रिँदा घटना भएको हो ।
झडपमा धारिलो हतियार प्रहारबाट गम्भीर घाइते भएका स्याङ्तानलाई उपचारको लागि अस्पताल लैजाँदै गर्दा मृत्यु भएको प्रहरीले जनाएको छ । झडपमा परी काठमाडौं महानगरपालिका–१ का विकास वाइवा, मकवानपुरका राजु तामाङ र मकवानपुरकै हस्तसिंह तामाङ गम्भीर घाइते छन् । घाइतेहरूको भैरहवा मेडिकल कलेजमा उपचार भइरहेको डिएसपी थापाले जानकारी दिए ।
‘घटनास्थलबाट एउटा चक्कु बरामद भएको छ,’ डिएसपी थापाले भने, ‘मृतक र घाइते तीनै जनालाई सोही चक्कु प्रहार भएको आशंका गरिएको छ । घटनाको सम्बन्धमा थप अनुसन्धान भइरहेको छ ।’ मृतक स्याङतानको शव अहिले भैरहवा मेडिकल कलेजमै राखिएको छ ।
