बेलवारी । बेलवारी जेसिजले बेलबारी नगरपालिका वडा नं २, लालभित्ती निवासी एञ्जल धिमालको उपचारको लागि रु.२५ हजार सहयोग गरेका छन् । बिहीबार एञ्जलको घर पुगेर उपचारार्थ रकम रु.२५ हजार परिवारलाई हस्तान्तरण गरेका हुन ।
एञ्जल, वीरेन्द्र धिमाल र कुमारी श्रेष्ठ धिमालकी दोस्रो सन्तान हुन् । उनी जन्मजात कलेजोसम्बन्धी समस्याबाट ग्रसित रहँदै आएकी छिन । कलेजो बिग्रँदै जाँदा सुधार नहुने देखिएपछि उनको कलेजो प्रत्यारोपण गर्नु पर्ने भएको छ ।
बालिकाकाको भारतको हरियाणा स्थित मेदान्त अस्पतालमा उपचार भइरहेको छ । उपचारको नाममा केवल रोकथाम मात्रै हुँदै आएको छ भने अब चाँडै कलेजो प्रत्यारोपण नगरे जुनसुकै बेला पनि बालिकालाई खतरा आउन सक्ने भनेर चिकित्सकले भनेपछि परिवार चिन्तामा परेका छन् । आमा आफैँले कलेजो दिने भनेकी छिन् । तर कलेजो प्रत्यारोपणका प्रक्रिया जटिल र अत्यन्तै खर्चिलो रहेको बताइन्छ ।
अस्पतालले यसका लागि नेपाली रुपैयाँ ४० लाख जति खर्च लाग्ने बताएको छ । ६ वर्ष सम्म नानीको उपचार गर्दा लगभग २० लाख जति खर्च भइसकेको परिवारले जनाएको छ । छोरीकै उपचारका लागि अहिले सम्म लागेको ऋण तिर्नका लागि नानीको बुबा वीरेन्द्र हाल मलेसियामा मजदुरी गरिरहेका छन् । छोरीलाई बचाइदिन आमाको आग्रह एन्जलसकी आमा कुमारी श्रेष्ठ धिमालले सबै मनकारी मनहरूसँग आफ्नी छोरीको प्राण बचाइदिन अनुरोध गरेकी छिन् ।
