बेलबारी । बेलबारी नगरपालिका प्रमुख दिल प्रसाद राईमाथि दुर्व्यवहार भएको छ । शुक्रवार बेलबारी नगरपालिका वडा नं.३ मा रहेको मालपोत र नापि शाखा कार्यालय क्षेत्रमा हुने अव्यवस्थित पार्किङको विवादमा नगर प्रमुख राईमाथि दुर्व्यवहार भएको हो ।
उक्त क्षेत्रको पार्किङलाई व्यवस्थापन गर्ने विषयको विवाद करिब एक वर्ष भन्दा बढी भइसकेको छ । टोल विकास संस्थाद्वारा पार्किङको व्यवस्थापन गर्ने प्रयास विवादकै कारण असम्भव भए पछि नगरपालिका कार्यालयले जिम्मेवारी लिएको थियो ।
उक्त क्षेत्रमा दैनिक हजारौँको संख्यामा मानिसको आवतजावत हुने गर्छ तर बाटो भने सवारीसाधनसहितको आवतजावतको लागि साँघुरो छ । एम्बुलेन्स, दमकल लगायत अत्यावश्यक सवारी साधन आकस्मिक रूपमा चलाउनु परे, राजमार्ग निस्कन वा राजमार्ग देखी उक्त क्षेत्र पार गर्न निकै सकस हुने गर्छ ।
नगरपालिकाले पार्किङ व्यवस्थापनको लागि नियम निर्माण गरी ठेक्का लगाएको छ । तर नगरपालिकाका अनुसार विराटनगर निवासी राजेश रिजालको नृतत्वमा लेखापढी संघका केही व्यक्तहरूको टोलीले नियम पालनाको सट्टा अवज्ञा गर्ने चुनौती दिँदै आएका छन् ।
शुक्रवारको विवाद पनि लेखापढी संघका अध्यक्ष राजेश रिजालको सोच अनुसार नै नियम पालनाको अवज्ञाको व्यवहार देखियो । केही युवाहरूको समूह तथा लेखापढी संघका केही व्यक्तिहरूले पार्किङ नतिर्ने भन्दै बाटो अवरोध हुने गरी बाइक राखेको कारण विवाद सृजना भएको हो ।
अहिले सामाजिक सञ्जालमा नगर प्रमुख राईसँग भएको विवादको भिडियो भाइरल भएको छ । उक्त भिडियोमा नगर प्रमुख राई पनि आक्रोशित छन् भने अन्य मानिसहरूले आक्रोशित रूपमा आक्रमण गर्ने शैलीमा प्रतिकार उत्रिएको देखिन्छ ।
नगर प्रमुख राईका अनुसार घर जाने बाटो अवरोध हुने गरी सवारी साधना राखे पछि नराख्न जानकारी गराउँदा आक्रोशित रूपमा केही युवाहरू नगर प्रमुखको गाडी ठटाउँदै प्रतिबाधमा उत्रिएका थिए । सोही कारण व्यवस्थित पार्किङ गर्नै पर्ने अडानमा गाडीबाट निस्किएर उक्त युवाहरूसँग राईको वादविवाद सुरु भएको थियो । नगर प्रमुखको निवास नापि शाखा कार्यालय दक्षिण पूर्व तर्फ रहेको छ ।
आफूहरूलाई लेखापढी संघको बताउने उक्त समूहले पार्किङ शुल्क तिर्न नसक्ने बताएका छन् । ठेकेदारका अनुसार पार्किङको व्यवस्थापनको शुल्क बाइकको रु.१५, गाडीको रु.३५, सफारीको रु.२० लिने गरेको छ । तर लेखापढी संघमा आबद्ध लेखापढी व्यवसायको एक बाइक भने निःशुल्क गरिएको शिव जङ्ग क्षेत्रीले जनाए ।
अहिले लेखापढी संघका केही नेतृत्वहरूको दादागिरी भएको भन्दै स्थानीय पनि आक्रोशित भएका छन् । बेलबारी नगरपालिकाले नियम पालना गराउन कडाइ गर्नुको साथै पार्किङ स्थल अझै व्यवस्थित गर्नु पर्ने स्थानीयको आग्रह रहेको छ । स्थानीयको आग्रह अनुसार नगरपालिकाले चाडै समाधान गर्ने नगर प्रमुख राईले बताएका छन् ।
नियम सबैको लागि एकै हो । तसर्थ स्थानीय सरकारले नगर विकासको लागि निर्माण गरेको सही नियम पालना गर्नु नागरिकको कर्तव्य हो । तर अवज्ञा गर्दै आक्रमण गर्ने प्रयास गर्नु, दुर्व्यवहार गर्नु गैरकानुनी र निन्दनीय रहेको स्थानीय युवा हेमन्त गुरुङ बताउँछन् ।
