नेपाली भाषामा हुने कला क्षेत्रकै सर्वाधिक उच्च नगद पुरस्कार सहित विश्व व्यापी फ्रेण्ड च्वाइस रियालिटी शो गायन तथा नृत्य प्रतियोगिता हुने भएको छ । गायन र नृत्य प्रतियोगिता विजेताहरूलाई ३ करोड ४० लाख नगद राशि प्रदान गरिने भएको छ । विश्वको जुनसुकै स्थानमा रहे पनि नेपाली भाषा, कला र संस्कृति नभुलोस् भन्ने उद्देश्यले नेपाली भाषामा गायन र सोही भाषाको गीतमा नृत्य प्रतियोगिता हुन लागेको हो ।
इन्ट्रा नेशनल वेलफेयर एण्ड सपोर्ट फाउन्डेसन अफ अमेरिकाले आज (फागुन १०) झापाको दमकमा पत्रकार सम्मेलनको आयोजना गरेर विश्व व्यापी गायन तथा नृत्य प्रतियोगिता सुरु भएको जनाएको छ । नेपाल टेलिभिजनबाट प्रसारण हुने ‘मेरो भ्वाइस यूनिभर्स र मेरो डान्स यूनिभर्स’ दुवै प्रतियोगिता विश्वको विभिन्न देशमा अडिसन भइरहेको इन्ट्राले जनाएको छ । यसै क्रममा नेपालको १ नं. प्रदेशको लागि फागुन २० र २१ गते अडिसन हुने जानकारी दिइएको छ । अडिसन झापा दमक ९ स्थित सरस्वती सेकेन्डरी स्कुलमा हुने भएको हो ।
दमकसँगै नेपालको लागि नेपालगन्ज, बुटवल, काठमाडौं लगायतका स्थानमा अडिसन हुने भएको छ । फाउन्डेसन आफैले तयार गरेको ब्राण्ड ‘मेरो भ्वाइस यूनिभर्स’का विजेताले १ करोड, फस्ट रनरअपले ३० लाख र सेकेन्ड रनरअपलाई २० लाख नगदसहित ट्रफी प्रदान गरिने छ । यस्तै, ‘मेरो डान्स यूनिभर्स’को विजेताले पनि एक करोड रुपैयाँ पुरस्कार पाउनेछन् । भने फस्ट रनरअपले ३० लाख रुपैयाँ र सेकेन्ड रनरअपले २० लाख रुपैयाँ पुरस्कार पाउनेछन् । यो पुरस्कार राशि नेपाली भाषाको कला क्षेत्रको हलसम्मकै उच्च हो । ‘मेरो डान्स यूनिभर्स’लाई पनि सोही बराबर पुरस्कार प्रदान गरिने बताइएको छ ।
यो सँगै नेपाली संस्कृति झल्किने ग्रुप डान्सको विजेता, दोस्रो र तेस्रो हुने टिमलाई २०, १५ र ५ लाख नगद पुरस्कार प्रदान गरिने इन्ट्रा नेपाल राम बानियाले बताए । दुवै प्रतियोगितामा सहभागी हुन चाहने कलाकारहरू १८ वर्ष पुगेको र ग्रुप डान्सको लागि चार जना भन्दा बढी कलाकार हुनुपर्ने आयोजकले जनाएको छ । प्रतियोगिता नेपाल बाहेक भुटान, भारतको लागि सिलिगुडी, अष्ट्रेलिया, म्यानमार, थाइल्याण्ड, क्यानडा, अमेरिका र युरोपको विभिन्न देशहरूमा अडिसन भइरहेको इन्ट्राले जनाएको छ । प्रतियोगितामा सहभागी हुन चाहने कलाकारहरूले अनलाइन आवेदन दिन सक्ने आयोजकले जनाएको छ ।
‘मेरो भ्वाइस यूनिभर्स’ अर्थात् गायनतर्फ सुरेश अधिकारी, अन्जु पन्त, शिव परियार, पुष्पन प्रधान, सुजाता वर्मा निर्णायक रहने भएका छन् । ‘मेरो डान्स यूनिभर्स’ अर्थात् नृत्यतर्फ मिथिला शर्मा, दिलीप रायमाझी, शंकर बीसी, केकी अधिकारी, प्रियंका कार्की, र नरमान राई रहने छन् ।
