काठमाडौँ, १६ मङ्सिर । सरकारले दक्षिण अफ्रिका, हङकङसहित नौ देशबाट आउने नागरिकलाई नेपाल प्रवेशमा प्रतिबन्ध लगाउने भएको छ ।आज (बिहीबार) बसेको मन्त्रिपरिषद् बैठकले दक्षिण अफ्रिका, बोत्स्वाना, जिम्बाब्बे, नामिबिया, लेसोथो, इसबाटिनी, मोजाम्बिक, मलावी र हकङकबाट आउने यात्रु, ती देशलाई ट्रान्जिट बनाएर आउने र तीन हप्ताभित्र ती मुलुकको भ्रमण गरी आउनेहरुलाई नेपाल प्रवेशमा रोक लगाएको हो ।
उनीहरूलाई आज (बिहीबार) राति १२ बजेदेखि नेपाल प्रवेशको अनुमति नदिने निर्णय भएको छ । हाल ती मुलुकबाट नेपालतर्फ आउँदै गर्दा बाटोमा रहेका यात्रुले भने अनिवार्य क्वारेन्टिनमा बस्नुपर्नेछ । हालसम्म २४ देशमा यो नयाँ भेरियन्ट फेला परिसकेको छ ।
ती देशमा कोरोना भाइरसको नयाँ ‘ओमिक्रोन’ भेरियन्ट भेटिएकाले नेपाल प्रवेशमा कडाइ गरिएको हो । सङ्क्रमणको जोखिम भएका मुलुकबाट आउने यात्रुलाई अन अराइभल भिसा नदिने निर्णय भएको एक मन्त्रीले बताए ।
नयाँ भेरियन्टको जोखिम बढिरहेको भन्दै सङ्क्रमणको पहिचान गर्न स्वास्थ्य तथा जनसङ्ख्या मन्त्रालयले पोजिटिभ देखिएका यात्रुहरू मध्ये यात्राको विवरण भएका व्यक्तिहरूको नमुना सङ्कलन गरी जीन सिक्वेन्सिङको लागि आवश्यक व्यवस्था मिलाउन स्वास्थ्य मन्त्रालयलाई निर्देशन दिएको छ ।
नयाँ भेरियन्ट सङ्क्रमणको जोखिम भएका मुलुकहरूमा अति आवश्यक बाहेक यात्रा नगर्न पनि सरकारले यात्रा सुझाव जारी गर्ने निर्णय गरेको छ । ती मुलुकमा जाने सरकारी कर्मचारी वा प्रतिनिधिमण्डलले पनि सरकारको स्वीकृति लिएर मात्रै जान पाउने छन् । यस्तै स्वास्थ्य तथा जनसङ्ख्या मन्त्रालयलाई दैनिक २ लाख जनालाई खोप लगाउने अनिवार्य व्यवस्था मिलाउन भनिएको छ । (नयाँ पेजबाट)
