–इच्छा
चराहरूको रात्री स्वप्न
पूरा हुनुभन्दा अगाडि
निशालाई चिरेर रविले
निर्वाध स्पर्श गरेजस्तै पृथ्वीलाई
निर्विरोध टेक्न पाउन् हरेक नेपालीले
दुई पाउ जमिन ।
पूरा बनोस् तीन करोड आँखाले
एकैसाथ देखेको
बुद्धको छातीजस्तै शान्त नेपाल
निर्माण गर्ने अभिनव सपना
विदेशबाट आउने ठुलो जहाजमा
हरेक दिन नेपालबाट नउडुन्
अभावका रित्ता झोलाहरू ।
हाम्रै बारीमा फल्ने अनारका दानाहरूले
सिकाइ रहन्छन् मेलमिलापको पाठ
मकैका दानाहरू टम्म मिलेर
बसेजस्तै खोयाहरूमा
सबै नेपाली निर्विवाद बस्न सकुन्
साझा आकाशमुनि ।
हरेक रात सपनामा देखेको
फराकिलो बाटो
उज्यालो नेपाल
छिट्टै विपना बनोस्
कर्णालीले पनि देख्न पाओस्
समृद्धिको अनुहार
जुम्लाको स्याउसँग
ओलाङ्चुङगोलाको राडी पाखी
साट्न सकुन् नेपालीले ।
युवाको पसिनाले सिञ्चित भएर
जन्माउन पाओस्
आफ्नो उर्वर गर्भबाट
माटोले लहलह अनाजपात ।
कोदाली र जिन्दगी
पर्यायवाची बुझेका बिर्खे दाइ
थाप्लोको नाम्लो र सुख
एउटै सम्झेकी
मेरी बुढी आमाले
लिन पाउन् एक फोक्सो
सुखको सास
धनुले रेटेजस्तै
सारङ्गीको शरीर
महलहरूले रेट्न नपाउन
झुपडीको मुटु ।
चित्रकारले क्यान भासमा
कोरेजस्तै सफल चित्र
पाठशालामा हाम्रा
कलिला नानीहरूले
कोर्न पाउन् उज्ज्वल भविष्यका
सुनौला तस्बिरहरू ।
सत्तामा गण्डकीको जलजस्तै
निष्कपट अनुहार
देख्न पाइयोस् ।
पानी परेर खुलेको
आकाश जस्तै मन भएका
सयौँहुल मान्छेहरू अटाउने
एउटा सुन्दर वाटिका
बनाउनु छ अब
जहाँ खुसीले फुल्न पाओस्
चार जात छत्तीस वर्णजहाँ फुल्न पाओस्
हिमाल पहाड तराई ।
-तेह्रथुम ।
(सङ्घीय मामिला तथा सामान्य प्रशासन मन्त्रालयले निजामती सेवा दिवस २०७८को अवसरमा आयोजना गरेको राष्ट्रव्यापी कविता प्रतियोगितामा प्रथम स्थान हासिल गरेको कविता ।)
