म्याग्दी, २६ श्रावण । म्याग्दीको सदरमुकाम बेनी बजारमा मङ्गलवार बिहान भएको आगलागीबाट लाखौँको धनमाल नष्ट भएको छ । बिहान २ः४५ बजेको समयमा भएको आगलागीबाट बेनी बजारको न्यूरोडमा अवस्थित दुई पसल पूर्णरुपमा नष्ट हुँदा लाखौँको धनमाल जलेर नष्ट भएको प्रहरीले बताएको छ ।
आगलागीबाट बेनी नगरपालिका–८ स्थित न्यूरोडको जीवनबहादुर विश्वकर्माको घरमा सञ्चालनमा रहेका रघुगंगा डेरी र नयन स्टोर्स दुवै जलेर नष्ट भएका छन् । आगो डेरी पसलबाट सल्किएको र डेरी हुँदै नयन स्टोर्समा पुगेको थियो । आगो प्रहरीले नियन्त्रणमा आइसकेको छ । आगो निभाउन नेपाल प्रहरी, सशस्त्र प्रहरी र नेपाली सेनाकोसमेत टोली परिचाल भएको थियो ।
आगोलागिबाट यति नै क्षति भयो भनेर आधिकारिक निकायबाट पुष्टि नभए पनि आगलागीबाट लाखौँ मूल्यको सामान जलेर नष्ट भएको नयन स्टोर्सका प्रोप्राइटर जगन्नाथ शर्माले जानकारी दिएका छन् ।
