काठमाडौँ, २१ श्रावण । नेपालमा कोरोना सङ्क्रमण दर बढ्दो क्रममा रहेको छ । बुधवारको तुलनामा केही घटेजस्तो देखिए पनि अघिल्ला दिनको तुलनामा भने यो सङ्ख्या अत्याधिक रहेको छ । पछिल्लो २४ घण्टामा थप ३,९३८ जनामा कोरोना भाइरस संक्रमण पुष्टि भएको छ ।
स्वास्थ्य तथा जनसङ्ख्या मन्त्रालयका अनुसार ११,८७० पीसीआर परीक्षणमा ३००७ जना र ६,५३८ एन्टिजेन परीक्षणमा ९३१ जना गरी ३९३८ जनामा संक्रमण पुष्टि भएको हो ।
मन्त्रालयका अनुसार पछिल्लो २४ घण्टामा कोरोना सङ्क्रमणमुक्त हुनेको सङ्ख्या २,०१२ रहेको छ । बिहीबार थपिएसँगै नेपालमा कोरोना सङ्क्रमितको कुल सङ्ख्या ७ लाख ८ हजार ७९ पुगेको छ । हाल सम्ममा कोरोनाबाट ९,९९४ जनाको मृत्यु भएको छ ।
स्वास्थ्य तथा जनसङ्ख्या मन्त्रालयका अनुसार हाल देशभर ३४ हजार ४२२ जना सक्रिय सङ्क्रमित रहेका छन् ।
