बाँके, १७ श्रावण । आफ्नै भाइको हत्याको आरोपमा बाँकेमा दाजु पक्राउ परेका छन् । आफ्नै सहोदर ३८ वर्षीय भाइको कुटपिट गरी हत्या गरेको आरोपमा खजुरा गाउँपालिका–२ एल गाउँ बस्ने ४० वर्षीय गुमान सुनार पक्राउ परेको प्रहरीले जनाएको छ ।
इलाका प्रहरी कार्यालय धनौलीले गुमानले सामान्य विवादकै कारण आफ्नै ३८ वर्षीय सहोदर भाइ गणेश सुनारलाई कुटपिट गरेको, दाजुको कुटाइबाट घाइते भएका गणेशको आफ्नै घरमा मृत्यु भएको जनाएको छ । भाइलाई कुटपिट गर्ने गुमानले मादक पदार्थ सेवन गरेको पनि प्रहरीले जनाएको छ ।
इलाका प्रहरी कार्यालय धनौली र प्रहरी चौकी राधापुरबाट खटिएको प्रहरीले कुटपिट गर्ने गुमानलाई पक्राउ गरी अनुसन्धान सुरु गरेको छ ।
