सुन्दरहरैँचा,१ श्रावण । मोरङको सुन्दरहरैँचामा पेस्तोल देखाएर सुन पसलमा लुटपाटको प्रयास परिवारका अरू सदस्य बाहिर निस्किएर हल्ला गरेपछि असफल भएको छ ।
सुन्दरहरैँचा नगरपालिका वडा नं १० स्थित खगेन्द्र थापाको शिव पञ्चायन ज्वेलर्समा शुक्रवार दिउँसो दुई वटा मोटरसाइकलमा आएका लुटेराहरूको प्रयासलाई ज्वेलर्स सञ्चालक थापाले असफल पारिदिएका छन् । पसल सञ्चालक थापाका अनुसार दुई वटा बाइकमा आएका चार जना लुटेराहरूले पेस्तोल देखाउँदै पसलमा छिरेर धम्काएर लुट्ने प्रयास गरेको थियो । तर परिवारका अरू सदस्यले होहल्ला गर्दै बाहिर निस्केपछि ती व्यक्तिहरू भागेका थिए । थापाका अनुसार ती व्यक्तिहरूले केही पनि सामान भने लान पाएनन् ।
घटनाको जानकारी पाउनसाथ पुगेको इलाका प्रहरी कार्यालय बेलबारीको टोलीले अनुसन्धान गरिरहेको जनाएको छ ।
