सुन्दरहरैँचा, २९ असार । मोरङको गछिया खोलामा एक जना युवती मृत अवस्थामा फेला परेकी छिन् ।सुन्दरहरैँचा नगरपालिका वार्ड नं ७ की २४ वर्षीय छेविनी ऋषिदेव मृत अवस्थामा फेला परेकी मोरङ प्रहरीले जनाएको छ । प्रहरीले ऋािदेवको शव गछिया खोलाको बिचको भँगालोमा घोप्टो परेर अड्किरहेको अवस्थामा फेला पारेको थियो ।
खोलाको भँगालोभित्र युवतीको लास देखेर स्थानीयले खबर गरे पछि घटनास्थलमा पुगेको इलाका प्रहरी कार्यालय बेलबारीको टोलीले शवलाई खोलाबाट बाहिर निकालेर पोस्टमार्टमका लागि बिपी प्रतिष्ठान धरान पठाएको छ ।
प्रारम्भिक अनुसन्धानबाट आइतबार बेलुका श्रीमान् श्रीमतीबिच घर झगडा भएको खुलेपछि घटनाको वास्तविकता पत्ता लगाउन प्रहरीले मृतकका श्रीमान् २६ वर्षीय मन्जे ऋषिदेवलाई नियन्त्रणमा लिएर अनुसन्धान गरिरहेको छ । मृतक छेविनी भने गछिया खोलामा ढुङ्गा – गिट्टी सङ्कलनको काम गर्थिन् ।
