बेलबारी, २५ असार । मोरङको बेलबारी नगरपालिमा लागूऔषध ब्राउन सुगर सहित ३ जना पक्राउ परेको छ । बिहीबार इलाका प्रहरी कार्यालय बेलबारीले लागूऔषधसहित ३ जनालाई वडा नं. १ स्थित गाईघाट टोलमा पक्राउ गरेको हो ।
पक्राउ पर्नेमा बेलबारी १ का ४६ वर्षीय बुद्धिमान तामाङ र धनकुटा हिलेका दुई जना महिला रहेका छन् । लागूऔषध ब्राउन सुगरको कारोबार भइरहेको प्राप्त गोप्य सूचनाको आधारमा १ नम्बर प्रदेश प्रहरी कार्यालय विराटनगर र इलाका प्रहरी कार्यालय बेलबारीबाट खटिएको प्रहरी टोलीले तामाङकै घरबाट उनीसहित ३ जनालाई ब्राउन सुगर सेवन गरिरहेको अवस्थामा पक्राउ गरेको प्रहरीले जानकारी गराएका छन् ।
प्रहरीका अनुसार तामाङको घरमा खानतलासी गर्दा धानको भकारी भित्र लुकाई राखेको लागूऔषध ब्राउन सुगर १३ ग्राम ५४० मिलिग्राम फेला पारेको छ । पक्राउ परेका तिनै जनालाई थप अनुसन्धान भइरहेको इलाका प्रहरी कार्यालय बेलबारीले जनाएको छ ।
