बेलबारी, २३ जेठ । इलाका प्रहरी कार्यालय बेलबारीले मोटरसाइकल चोरीमा संलग्न ७ जनालाई पक्राउ गरेको छ ।
जेठ १२ गते राती मोरङको सुन्दरहरैँचा ४ बस्ने मदन कुमार चौधरीको नाममा रहेको प्र–१–०५–००१ प–००६१ नम्बरको रातो कलरको २०० सिसिको लक मोटरसाइकल घरबाटै चोरी भए पश्चात् इलाका प्रहरी कार्यालय बेलबारीबाट सूक्ष्म रूपमा अनुसन्धान तथा खोजतलासको क्रममा सातै जना अभियुक्तलाई पक्राउ गरिएको प्रहरीले जनाएको छ ।
पक्राउ पर्नेमा इटहरी १३ का २८ वर्षीय राजेश मेहता, इटहरी २० का ३८ वर्षीय बलराम गुरुङ, इटहरी २ का ३९ वर्षीय सुवास लिम्बु, इटहरी ३ का ३० वर्षीय मचिन राई, इटहरी ४ का २१ वर्षीय गोलमोल राई, १९ वर्षीय रोमन परियार र २१ वर्षीय मनोज परियार रहेका छन् ।
खोजतलासको क्रममा प्रहरीले चोरी भएको मोटरसाइकल इटहरी १३ का राजेश मेहताको घरबाट फेला पारेको थियो । मेहता पक्राउ परे पश्चात् चोरीमा संलग्न बाँकी ६ जनालाई आ–आफ्नै घरबाट पक्राउ गरी थप अनुसन्धान गरिरहेको इलाका प्रहरी कार्यालय बेलबारीले जनाएको छ ।
