बेलबारी, १४ जेठ । मोरङको कानेपोखरीमा भएको मोटरसाइकल दुर्घटनामा परेर एक युवकको मृत्यु भएको छ ।
प्रदेश १ ट्राफिक प्रहरी कार्यालयले दिएको जानकारी अनुसार को ३२ प ३७६९ नम्बरको मोटरसाइकललाई को २ त ९८५८ नम्बरको ट्याक्टरले ठक्कर दिँदा भएको दुर्घटनामा परेर मोटरसाइकलमा सवार कानेपोखरी गाउँपालिका–२ केरौनका ३२ वर्षीय दिलीप चौधरीको मृत्यु भएको छ ।
प्रदेश १ ट्राफिक प्रहरी प्रमुख एसपी सञ्जीव शर्माले दिएको जानकारी अनुसार उत्तरबाट दक्षिणतर्फ जाँदै गरेको ट्याक्टरले कानेपोखरी–५ शान्ति चोकमा बिहीबार साँझ ६ बजेतिर सोही दिशातर्फ जाँदै गरेको मोटरसाइकललाई ठक्कर दिएको थियो । कानेपोखरी–रङ्गेली सडक खण्डमा भएको दुर्घटनामा परेर गम्भीर घाइते भएका मोटरसाइकल चालक कानेपोखरी गाउँपालिका–२ केरौनका ३२ वर्षीय दिलीप चौधरीको उपचारका क्रममा विराटनगरको कोसी अस्पतालमा साँझ ७ः३० बजेतिर मृत्यु भएको हो ।
दुर्घटनापछि ट्याक्टर र मोटरसाइकललाई प्रहरीले नियन्त्रणमा लिएर घटनाको अनुसन्धान थालेको छ । फरार रहेका ट्याक्टर चालकको खोजी भइरहेको प्रहरीले जनाएको छ ।
