विराटनगर, २२ वैशाख । कोभिडबाट मृत्यु हुने चिकित्सकका परिवारलाई प्रदेश १ सरकारले २५ लाख क्षतिपूर्ति दिने निर्णय गरेको छ । कोभिड–१९ को पहिचान, निदान, उपचार, बिरामीको ओसारपसार र शव व्यवस्थापनमा प्रत्यक्ष रूपमा संलग्न भएका चिकित्सक, स्वास्थ्यकर्मी, चालक र सफाइकर्मीका साथै कर्मचारीहरूको कोभिड–१९ का कारणबाट मृत्यु भएमा २५ लाख क्षतिपूर्ति दिने प्रदेश सरकारले निर्णय गरेको छ ।
बुधवार बसेको मन्त्रिपरिषद्को बैठकले मृतकका परिवारलाई क्षतिपूर्ति स्वरूप नेपाल सरकारले प्रदान गर्ने क्षतिपूर्ति रकमसँग दोहोरो नहुने गरी प्रदेश सरकारबाट एकमुष्ट २५ लाख प्रदान गर्ने निर्णय भएको बैठक पछि सामाजिक विकास मन्त्री उषाकला राईले जानकारी दिनुभयो ।
कोभिड–१९ का संक्रमितको उपचारका लागि खटिने क्रममा संक्रमित भई बिरामी भएमा प्रदेश सरकारले तोकेको सरकारी तथा निजी अस्पतालमा उपचार गर्दा लागेको सम्पूर्ण खर्च प्रदेश सरकारले व्यहोर्ने समेत निर्णय भएको मन्त्री राईले बताउनुभयो । उहाँले भन्नुभयो,‘ कोभिड–१९ बाट संक्रमित भई होम आइसोलेसनमा बस्न सक्ने अवस्था नभई घरबाहिर संस्थागत वा होटेल आइसोलेसनमा बस्दा लागेको सम्पूर्ण खर्च समेत प्रदेश सरकारले व्यहोर्ने छ ।’
प्रदेश सरकारद्वारा सञ्चालित कोसी अस्पताल कोभिड–१९ उपचार केन्द्र, प्रदेश जनस्वास्थ्य प्रयोगशाला, विराटनगर तथा प्रदेश सरकार मातहतका सम्पूर्ण अस्पतालको कोभिड वार्डमा प्रत्यक्ष रूपमा खटिने चिकित्सक, स्वास्थ्यकर्मी, चालक र सफाइकर्मीका साथै कर्मचारीहरूलाई सुरु तलब स्केलको पचास प्रतिशत जोखिम भत्ता प्रदान गर्ने मन्त्रिपरिषद्ले निर्णय गरेको सामाजिक विकास मन्त्री राईले बताउनुभयो । उहाँका अनुसार चिकित्सक र स्वास्थ्यकर्मीका लागि होम क्वारेनटिनमा बस्न सक्ने अवस्था नभई होटेल क्वारेनटिन बस्नु पर्ने भएमा तोकिए बमोजिमको होटेल क्वारेनटिन तथा चालक, सफाइकर्मी, कार्यालय सहयोगीका साथै व्यवस्थापनमा खटिने अन्य कर्मचारीहरूका लागि प्रदेश सरकारले प्रबन्ध गरेको खाना तथा खाजा सहितको क्वारेनटिन वा होटेल क्वारेनटिनको प्रबन्ध गर्ने मन्त्रिपरिषद् बैठकले निर्णय गरेको छ ।
